Лукашэнка змяніў камандуючага ССА
10 студзеня, Позірк. Палкоўнік Аляксандр Ільюкевіч прызначаны камандуючым сіламі спецыяльных аперацый (ССА) Узброеных сіл, паведаміла 9 студзеня прэс-служба Аляксандра Лукашэнкі.
Генерал-маёр Вадзім Дзенісенка, які займаў гэту пасаду з 2014 года, звольнены з ваеннай службы ў запас па ўзросце з правам нашэння ваеннай формы адзення і знакаў адрознення. Яму 58 год.
46-гадовы Ільюкевіч да прызначэння быў першым намеснікам камандуючага ССА.
Сілы спецыяльных аперацый — высокамабільны род войскаў Узброеных сіл, створаны ў 2007 годзе. З’яўляюцца пераемнікам паветрана-дэсантных войскаў і спецпрызна ГРУ СССР. Асноўнымі задачамі лічыцца контрдыверсійная дзейнасць, разведка, барацьба з незаконнымі ўзброенымі фарміраваннямі, “выкананне розных задач спецыяльнымі метадамі ў мэтах спынення ўзброенага канфлікту” адносна Беларусі.
ССА актыўна выкарыстоўваліся пры падаўленні масавых пратэстаў у 2020 годзе. Ад іх дзеянняў у Брэсце загінуў Генадзь Шутаў.
Экс-камандуючы Дзенісенка публічна выказваў гатоўнасць да задзейнічання ССА ў перыяд кампаніі па “выбарах прэзідэнта” ў 2025 годзе. “Калі неабходнасць будзе — будзем працаваць. Мы гатовы”, — заявіў ён на дзяржТВ у кастрычніку 2024 года.
Пасля поўнамаштабнага ўварвання Расіі ва Украіну ў лютым 2022 года, афіцыйна званага Масквой і Мінскам “спецыяльнай ваеннай аперацыяй” і падтрымліваемай рэжымам Аляксандра Лукашэнкі, Дзенісенка быў унесены ў санкцыйныя спісы ЕС і іншых краін Захаду.
