З 2020 года ліквідавана не менш за 1.990 НКА — Lawtrend

8 студзеня, Позірк. З 2020 года ў Беларусі ліквідавана не менш за 1.990 НКА — аб’яднанняў, прафсаюзаў, фондаў, недзяржаўных устаноў, асацыяцый, вынікае з новага агляду праваабарончай арганізацыі Lawtrend.

Усяго за 2025 год ліквідавана мінімум 99 НКА, за 2024-ы — 382, за 2023-ы — 336.

На канец лістапада было ліквідавана не менш 1.984 НКА, кастрычніка — 1.977, верасня — 1.970, жніўня — 1.950, ліпеня — 1.948, чэрвеня — 1.944, траўня — 1.936, красавіка — 1.926, сакавіка — 1.917, лютага — 1.905, студзеня — 1.896, на канец 2024 года — 1.891, на канец снежня 2023 — 1.509.

Паводле інфармацыі Lawtrend, на канец снежня 2025 года ў працэсе прымусовай ліквідацыі знаходзілася не менш за 1.220 некамерцыйных арганізацый. На канец лістапада такіх было 1.216, кастрычніка — 1.214, верасня — 1.211, жніўня — 1.193, ліпеня — 1.192, чэрвеня — столькі ж, траўня — 1.190, красавіка — 1.189, сакавіка і лютага — 1.188, студзеня — 1.187, снежня 2024-га — 1.186.

Рашэнне аб самастойнай ліквідацыі прыняло па меншай меры 770 НКА. На канец лістапада такіх было 768, кастрычніка — 763, верасня — 759, жніўня — 757, ліпеня — 756, чэрвеня — 752, траўня — 746, красавіка — 737, сакавіка — 729, лютага — 717, студзеня — 709, на канец 2024 года — 705.

Праваабаронцы падкрэсліваюць, што ў сувязі з выкананнем прафесійнай дзейнасці, удзелам у арганізацыях грамадзянскай супольнасці, праявай грамадзянскай актыўнасці турэмны тэрмін працягваюць адбываць не менш за тры прадстаўнікі праваабарончых арганізацый, дзясяткі прадстаўнікоў арганізацый грамадзянскай супольнасці, рэлігійных арганізацый, 19 прадстаўнікоў прафесійных саюзаў і працоўнага руху.

Адзначаецца, што 15 снежня на сайце Камітэта дзяржаўнага кантролю апублікаваныя планы выбарачных праверак на 1 паўгоддзе 2026 года.

Адбор суб’ектаў для ўключэння ў планы выбарачных праверак ажыццяўляецца на падставе крытэрыяў ацэнкі ступені рызыкі для адбору правяраемых суб’ектаў пры правядзенні выбарачнай праверкі. Як і ў папярэднія перыяды, у адпаведнасці з дадзенымі планамі ў дачыненні да некамерцыйных арганізацый, за некаторым выключэннем, праверкі кантралюючых органаў праводзяцца рэдка, адзначае Lawtrend. Нячастае трапленне ў планы выбарачных праверак “не азначае, што некамерцыйныя арганізацыі ў Беларусі не падлягаюць праверкам”, “пачынаючы з 2021 года, праверкі ў некамерцыйных арганізацыях праводзяцца на пастаяннай аснове”.

На думку праваабаронцаў, складанасць такіх праверак для НКА яшчэ і ў тым, што іх парадак не рэгламентаваны заканадаўствам, таксама заканадаўствам не абмежаваныя “кола пытанняў і функцыі рэгіструючых органаў пры правядзенні праверак”.