Пяткевіч застанецца адказнай за правядзенне ўступнай кампаніі

6 студзеня, Позірк. Указ “Аб удасканаленні ўступнай кампаніі” падпісаў 6 студзеня Аляксандр Лукашэнка, паведамляе яго прэс-служба.

Адзначаецца, што “дакумент накіраваны на тое, каб забяспечыць роўныя магчымасці абітурыентам пры паступленні ва ўстановы вышэйшай і сярэдняй спецыяльнай адукацыі пры справядлівым конкурсным адборы”.

Указам у чарговы раз створана Дзяржаўная камісія па кантролі за ходам падрыхтоўкі і правядзення ўступнай кампаніі, а таксама зацверджаны яе пастаянны склад.

Старшынёй камісіі зноў прызначаная віцэ-прэм’ер Наталля Пяткевіч, у склад таксама ўвайшлі прадстаўнікі Савета Рэспублікі і Палаты прадстаўнікоў Нацыянальнага сходу, органаў дзяржаўнага кіравання, кантралюючых органаў і грамадскіх арганізацый.

Паведамляецца, што камісія надзелена паўнамоцтвамі па кантролі за правядзеннем універсітэцкіх алімпіяд, якія даюць права на льготнае паступленне ў ВНУ, якія праводзяць такія алімпіяды.

Указам таксама “актуалізуюцца асобныя палажэнні правілаў прыёму асоб для атрымання вышэйшай і сярэдняй спецыяльнай адукацыі”. У прыватнасці, для паступлення ў ВНУ на завочную (дыстанцыйную) форму навучання больш не патрабуецца адпаведнасць працоўнага стажу абранаму профілю адукацыі.

Акрамя таго, удакладняюцца катэгорыі асоб, якія маюць “ільготы пры залічэнні ва ўстановы адукацыі ў сувязі са стварэннем каледжа Міністэрства ўнутраных спраў”.

Таксама ўводзіцца профільнае выпрабаванне па вучэбным прадмеце “Гісторыя Беларусі ў кантэксце сусветнай гісторыі”, паколькі гэтую дысцыпліну ў 10–11-х класах вывучаюць замест дысцыпліны “Гісторыя Беларусі”, гаворыцца ў паведамленні.

Пяткевіч была прызначаная старшынёй Дзяржкамісіі па кантролі за правядзеннем уступнай кампаніі летась 27 траўня, праз пяць дзён пасля свайго прызначэння на пасаду віцэ-прэм’ера, які курыруе сацыяльную сферу.

Галоўнымі задачамі дзяржкамісіі раней называліся забеспячэнне абароны правоў і законных інтарэсаў грамадзян і прадастаўленне абітурыентам роўных магчымасцяў пры паступленні ва ўстановы вышэйшай і сярэдняй спецыяльнай адукацыі, кантроль за падрыхтоўкай і правядзеннем цэнтралізаванага тэсціравання, іншых формаў уступных выпрабаванняў, прыняцце мер па ліквідацыі парушэнняў заканадаўства, якое рэгулюе арганізацыю і правядзенне прыёму, прыём грамадзян па пытаннях падрыхтоўкі і правядзення ўступных выпрабаванняў.