Скарацілася колькасць расійскіх партоў, якія выкарыстоўваюцца для экспарту беларускай прадукцыі — звесткі Мінтранса
6 студзеня, Позірк. Для экспарту беларускай прадукцыі ў цяперашні час задзейнічана 13 расійскіх партоў. Пра гэта, паводле інфармацыі дзяржСМІ, паведаміў часопісу “Эканоміка Беларусі” міністр транспарту і камунікацый Аляксей Ляхновіч.
Паводле яго слоў, за 10 месяцаў 2025 года аб’ём перавезеных праз іх грузаў вырас на 3,7% да аналагічнага перыяду папярэдняга года.
“Рэалізаваны пілотны праект па кансалідацыі і пастаўцы тавараў у краіны далёкай дугі. Беларускія экспартныя грузы адпраўленыя ў Афрыку (Егіпет, ПАР), Лацінскую Амерыку (Нікарагуа), Паўднёва-Усходнюю Азію (В’етнам, М’янма, Рэспубліка Карэя, Індыя) і Блізкі Усход (ААЭ), — удакладніў міністр. — Для скарачэння выдаткаў па дастаўцы беларускага экспарту міністэрства праводзіць перамовы аб зніжэнні чыгуначных тарыфаў. У выніку чыгуначнымі адміністрацыямі Расіі, Казахстана, Узбекістана, Туркменістана прадастаўленыя скідкі па асобных відах беларускіх грузаў”.
Ляхновіч таксама паведаміў, што “сумесна з расійскімі калегамі” працягваецца мадэрнізацыя участкаў чыгуначнай інфраструктуры 9-га агульнаеўрапейскага транспартнага калідора (паміж Грэцыяй і Фінляндыяй. — “Позірк”.) у напрамку на паўночны захад Расіі. Паводле яго слоў, завяршэнне работ намечана на 2026 год.
У верасні 2024 года Ляхновіч паведамляў, што Беларусь выкарыстоўвае для перавалкі сваёй прадукцыі 14 расійскіх партоў. Такім чынам, за год іх колькасць зменшылася.
Неабходнасць у перавалцы грузаў праз расійскія парты ўзнікла ў сувязі з заходнімі санкцыямі і адмовай літоўскіх партоў працаваць з Мінскам.
22 красавіка 2024 года было падпісана пагадненне аб тым, што ТАА “Марскі тэрмінал “Вароты Арктыкі” пабудуе ў Мурманску да 2028 года вялікі порт для перавалкі беларускіх грузаў. Праектным рашэннем прадугледжаны аб’ёмы перавалкі да 25–30 млн тон у год.
