51-гадовага жыхара Столінскага раёна прыдушыла аўтамабілем падчас рамонту, ён загінуў

6 студзеня, Позірк. 51-гадовы жыхар Столінскага раёна (Брэсцкая вобласць) загінуў пры рамонце аўтамабіля, паведамляе Дзяржаўны камітэт судовых экспертыз (ДКСЭ).

Мужчына рамантаваў свой аўтамабіль у двары дома, усталяваўшы яго на “элементы тратуарнай пліткі”, адзначае ДКСЭ. “Як мяркуецца, транспартны сродак упаў, прыціснуўшы ніжняй часткай рухавіка да зямлі ўладальніка аўтамабіля. Цела мужчыны выявіў сусед, які паведаміў пра здарэнне”, — гаворыцца ў паведамленні.

Экспертызай устаноўлена, што смерць мужчыны наступіла ў выніку “кампрэсійнай асфіксіі ў выніку здушэння органаў грудной клеткі і жывата масіўным прадметам (аўтамабілем)”.