У Літве перахопленая першая ў 2026 годзе паветраная кантрабанда цыгарэт з Беларусі
6 студзеня, Позірк. Пра перахоп першай ад пачатку 2026 года партыі кантрабандных цыгарэт, дастаўленых з Беларусі з дапамогай двух паветраных шароў, паведаміла 6 студзеня прэс-служба Міністэрства ўнутраных спраў Літвы.
Паводле інфармацыі ведамства, літоўскія памежнікі перахапілі нелегальны груз пасля апоўначы 6 студзеня ў Варэнскім раёне — непадалёк ад мяжы з Беларуссю.
Аэрастаты транспартавалі агулам 3.000 пачкаў цыгарэт Minsk Capital QS з беларускімі акцызнымі маркамі. Да грузу быў прымацаваны GPS-трэкер.
Па факце незаконнага абыходжання з падакцызнымі таварамі супрацоўнікі Службы аховы дзяржаўнай мяжы (САДМ) праводзяць дасудовае расследаванне.
Паведамляецца, што ў ноч на 6 студзеня “таксама было зафіксавана некалькі знакаў, характэрных для паветраных шароў”, аднак, паводле слоў міністра ўнутраных спраў Уладзіслава Кандратовіча, “Вільнюскі аэрапорт працаваў у звычайным рэжыме, а назіранне і кантроль паветранай прасторы былі ўзмоцненыя”.
Паводле звестак САДМ, папярэдні раз кантрабандныя цыгарэты на паветраных шарах былі перахопленыя летась 20 снежня. Тады на склады памежнікаў трапіла 3 такія грузы — больш за 4,3 тыс. пачкаў.
Ведамства нагадала, што агулам у 2025 годзе было перахоплена 635 партый тытунёвай кантрабанды, дастаўленых паветранымі шарамі з Беларусі. Стандартны памер партыі — 3 каробкі цыгарэт, або 1.500 пачкаў, “хоць сустракаюцца як меншыя, так і большыя аб’ёмы”. Звычайна да іх прымацаваны трэкер.
За ўвесь 2024 год у Літве было 226 выпадкаў затрымання нелегальных цыгарэт, дастаўленых паветранымі шарамі з Беларусі. У 2023-м — 3, у 2022-м — аніводнага.
Паводле даных МУС, летась з дапамогай дронаў і паветраных шароў у Літву было дастаўлена і трапіла на склады памежнікаў больш за 1,4 млн пачкаў цыгарэт. Памежнікі затрымалі 122 чалавекі, якія, як мяркуецца, маюць дачыненне да паветранай кантрабанды (у 2024-м — 46).
5 студзеня 2026 года міністр замежных спраў ФРГ Ёхан Вадэфуль, які наведваў Літву, заявіў на прэс-канферэнцыі (хутчэй за ўсё, абмовіўшыся), што ў апошнія месяцы больш за 6 тыс. шароў з кантрабандай з Беларусі парушылі літоўскую паветраную прастору і сталі сур’ёзнай перашкодай працы аэрапорта ў Вільнюсе.
“І я хацеў бы падкрэсліць: гэтая тактыка рэжыму ў Беларусі цалкам непрымальная і ў выпадку працягу не павінна проста так прайсці”, — падкрэсліў Вадэфуль.
Напрыканцы кастрычніка 2025 года Вільнюс закрыў пункты пропуску Мядзінінкай (з беларускага боку — Каменны Лог) і Шальчынінкай (Беняконі), дамагаючыся такім чынам рэакцыі Мінска на масавы прылёт з Беларусі паветраных шароў з кантрабандай, якія перашкаджалі ў тым ліку грамадзянскай авіяцыі Літвы.
Пагранпераходы аднавілі працу 20 лістапада. За тры тыдні, пакуль яны былі закрытыя, рэжым Аляксандра Лукашэнкі паспеў пастрожыць правілы знаходжання ў краіне літоўскага грузавога транспарту, увязаўшы іх з працай пунктаў пропуску. Паведамлялася, што ў Беларусі захрасла каля 1,3 тыс. зарэгістраваных у Літве грузавікоў, якія не могуць выехаць з краіны нават пры адкрытай мяжы.
Апошні раз абмежаванне паветранай прасторы над аэрапортам Вільнюса ў сувязі з уварваннем у паветраную прастору метэазондаў з кантрабанднай беларускай тытунёвай прадукцыі ўводзілася 6 снежня. З 9 снежня ў краіне абвешчаны рэжым экстрэмальнай сітуацыі.
