Латвія зменіць рэжым аховы на мяжы, калі Беларусь спыніць міграцыйны ціск — кіраўнік памежнай службы

29 снежня, Позірк. Нелегальная міграцыя на мяжы з Беларуссю “ненатуральнага паходжання”, таму змены рэжыму аховы магчымыя толькі ў тым выпадку, калі Мінск “вырашыць спыніць гэты ціск”. Такім чынам начальнік Дзяржаўнай памежнай аховы Латвіі Гунціс Пуятс 29 снежня ў эфіры перадачы Rīta panorāmā на тэлеканале LTV1 адказаў, пры якіх умовах можа быць скасаваны ўзмоцнены рэжым.

Улады Латвіі неаднаразова працягвалі ўзмоцнены рэжым аховы, уведзены ў прыграніччы з Беларуссю праз нелегальную міграцыю. У апошні раз — да 30 чэрвеня 2026 года.

Паводле слоў Пуятса, якія прыводзіць партал LSM, у плане міграцыйнага ціску самымі цяжкімі ў 2025 годзе былі летнія месяцы. Снежань “выдаўся спакойным, калі не лічыць адзін дзень, калі на мяжы было спынена 69 чалавек”.

Разам з тым чыноўнік прывёў у прыклад Польшчу, дзе “таксама бываюць дні, калі не рэгіструецца ніводнай спробы незаконнага пераходу, але пасля у нейкі дзень іх выяўляецца вельмі шмат”. Гэта, на яго думку, “сведчыць пра тое, што памежная ахова не можа расслабляцца і скарачаць рэсурсы”.

Прылёты метэаралагічных шароў з Беларусі, лічыць начальнік латвійскага памежнага ведамства, “з’яўляюцца хутчэй элементам гібрыднай атакі, чым сродкам для перавозкі кантрабанды”. Пуятс паведаміў, што паліцыя Латвіі распачала 24 крымінальныя працэсы ў сувязі з гэтымі аэрастатамі.

Праведзены “Позіркам” аналіз штодзённых даных памежных службаў сведчыць, што ад пачатку года суседнія краіны Еўрасаюза зафіксавалі 42,7 тыс. спробаў парушэння мяжы з боку Беларусі, у тым ліку Латвія — амаль 12 тыс. (больш чым удвая ў параўнанні з усім 2024 годам).

Аналіз пацвярджае словы Пуятса пра тое, што летнія месяцы на латвійска-беларускай мяжы былі напружанымі: у чэрвені было прадухілена 1.677 спробаў незаконнага перасячэння, ліпені — 2.045, жніўні — 1.222. Разам з тым найбольшая колькасць спробаў парушыць мяжу была зафіксаваная ў траўні — 2.247.

Міграцыйны крызіс на мяжы Беларусі і краін ЕС цягнецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.

Аляксандр Лукашэнка неаднаразова заяўляў, што беларускія пагранічнікі не будуць спыняць нелегальных мігрантаў, якія накіроўваюцца у Еўрасаюз праз Беларусь, бо іх туды нібыта “паклікалі”.