Чарговы беларускі спадарожнік выведзены на арбіту

29 снежня, Позірк. 52 касмічныя апараты рознага прызначэння, сярод якіх беларускі, выведзена на арбіту 28 снежня, вынікае з паведамлення расійскай дзяржкарпарацыі па касмічнай дзейнасці “Раскосмас”.

Ракета-носьбіт “Саюз-2.1б” са спадарожнікамі на борце стартавала з касмадрома Усходні (Амурская вобласць РФ) у 16:18 паводле мінскага часу. Апараты адлучаліся групамі на працягу пяці гадзін.

“Сярод іх — спадарожнікі навуковага і тэхналагічнага прызначэння ад арганізацый з Расіі і дружалюбных дзяржаў (Іран, Беларусь, Эквадор), — гаворыцца ў паведамленні. — Адукацыйныя спадарожнікі вырабленыя ў Маскве, Санкт-Пецярбургу, Самарскай, Ніжагародскай, Амурскай вобласці, Якуціі. Спадарожнікі, запушчаныя <…> з Усходняга, прызначаныя для дыстанцыйнага зандавання Зямлі, вывучэння электрамагнітных выпраменьванняў, кантролю суднаходства ў Сусветным акіяне, атрымання сігналаў перадатчыкаў “інтэрнэту рэчаў”, даследаванняў уплыву космасу на жывыя арганізмы”.

“На касмадроме Усходні кіраўнік “Раскосмасу” Дзмітрый Баканаў агледзеў аб’екты будаўніцтва і правёў сустрэчу са старшынёй прэзідыума Нацыянальнай акадэміі навук Беларусі Уладзімірам Каранікам. Бакі абмеркавалі актуальныя пытанні двухбаковай супрацы ў касмічнай сферы”, — паведаміла расійскае касмічнае агенцтва.

Дзяржкарпарацыя “Раскосмас” не ўдакладніла, які менавіта беларускі апарат быў дастаўлены на арбіту, аднак, верагодней за ўсё, гаворка пра спадарожнік зандавання іанасферы.

У красавіку 2025 года дырэктар УП “Геаінфармацыйныя сістэмы” НАН Сяргей Залаты заяўляў журналістам, што запуск гэтага апарата можа адбыцца ў трэцім квартале, але ў сярэдзіне восені ён удакладніў тэрміны, назваўшы найбольш верагодным часам вываду на арбіту снежань.

Спадарожнік зандавання іанасферы стаў пятым беларускім апаратам на арбіце планеты. Раней былі выведзеныя БКА — спадарожнік дыстанцыйнага зандавання Зямлі (ДЗЗ; 2012 год), Belintersat-1 — спадарожнік сувязі (2016), а таксама BSUSat-1 (2018) і BSUSat-2 (2023) — навучальныя нанаспадарожнікі Белдзяржуніверсітэта.

У 2028 годзе чакаецца запуск расійска-беларускага касмічнага апарата ДЗЗ са звышвысокай дазвольнай магчымасцю (35 см), які будзе ў ліку іншага рабіць здымкі для стварэння 3D-мадэлі мясцовасці. Паводле інфармацыі Залатога, Расія “робіць платформу і забяспечвае запуск”, Беларусь — “тэлескопы і наземную інфраструктуру”.