Польшча паведаміла пра начное ўварванне з Беларусі паветраных шароў з кантрабандай
25 снежня, Позірк. Пра ўварванне “аб’ектаў” з Беларусі ў калядную ноч на 25 снежня паведаміла аператыўнае камандаванне Узброеных сіл Польшчы.
“Пасля дэталёвага аналізу было ўстаноўлена, што гэта, хутчэй за ўсё, кантрабандныя паветраныя шары, якія рухаюцца па кірунку і з хуткасцю ветру“, — гаворыцца ў прэс-рэлізе.
Колькасць шароў не называецца. Іх рух “бесперапынна адсочваўся радарнымі сістэмамі”. У мэтах бяспекі частка паветранай прасторы над Падляскім ваяводствам была часова закрытая для грамадзянскіх палётаў.
“Аператыўнае камандаванне Узброеных сіл знаходзіцца ў пастаянным кантакце з адпаведнымі службамі, ажыццяўляючы бесперапынны абмен інфармацыяй і падаючы неабходныя даныя аб аб’ектах, за якімі вядзецца назіранне. Адпаведныя службы ідэнтыфікуюць іх і прымаюць неабходныя меры. Пагрозы бяспецы польскай паветранай прасторы не выяўлена. Сітуацыя знаходзіцца пад пастаянным наглядам, а сілы і рэсурсы застаюцца ў пастаяннай гатоўнасці для забеспячэння бяспекі паветранай прасторы Польшчы“, — падкрэсліваецца ў паведамленні.
Адзначаецца, што калядная ноч стала напружанай для польскіх сіл супрацьпаветранай абароны. Акрамя шароў знішчальнікі “перахапілі, візуальна ідэнтыфікавалі і суправадзілі выведвальны самалёт Расійскай Федэрацыі”, які ляцеў над міжнароднымі водамі Балтыйскага мора паблізу польскай паветранай мяжы.
10 верасня 2025 года ў Польшчу з тэрыторыі Беларусі і Украіны ўварваліся расійскія дроны без выбухоўкі. Частка апаратаў была збітая. За суткі да гэтага Варшава абвясціла аб закрыцці мяжы з Беларуссю ў сувязі з беларуска-расійскімі вучэннямі “Захад-2025“ (12-16 верасня). Мяжа была адкрыта 25 верасня.
Уварванне паветраных шароў з кантрабанднымі цыгарэтамі з Беларусі ў Літву восенню і на пачатку снежня стала прычынай неаднаразовага закрыцця Вільнюскага аэрапорта, размешчанага недалёка ад мяжы. Акрамя таго, з 29 кастрычніка па 19 лістапада Літва закрывала мяжу з Беларуссю.
Апошні раз аэрапорт Вільнюса прыпыняў працу ў сувязі з метэазондамі з Беларусі 6 снежня.
9 снежня ўрад Літвы абвясціў экстрэмальную сітуацыю дзяржаўнага ўзроўню праз “гібрыдную атаку Беларусі”. Рашэнне было прынятае “ў сувязі з пагрозай нацыянальнай бяспецы дзяржавы і небяспекай для жыцця і здароўя людзей, а таксама для маёмасці і (або) навакольнага асяроддзя, стваранага тым, што на тэрыторыю Літвы з Беларусі запускаюцца паветраныя шары, якія перавозяць кантрабанду”.
Спецыяльны пасланнік прэзідэнта ЗША Дональда Трампа па Беларусі Джон Коўл па вяртанні ў Вільнюс з Мінска, дзе 12 і 13 снежня праводзіў перамовы з Аляксандрам Лукашэнкам, заявіў, што апошні паабяцаў яму садзейнічаць у спыненні палётаў метэазондаў з Беларусі ў Літву.
15 снежня Савет Еўрасаюза ўвёў новы крытэр для ўключэння ў санкцыйныя спісы “фізічных асоб, арганізацый і органаў, якія атрымліваюць выгаду ад дзеянняў або палітыкі, якая мае дачыненне да Рэспублікі Беларусь, удзельнічаюць у іх альбо спрыяюць ім, калі такія дзеянні падрываюць або пагражаюць дэмакратыі, вяршэнству права, стабільнасці або бяспецы ў ЕС і яго дзяржавах-сябрах”. Паведамлялася, што пастанова “рушыла ўслед за нядаўнімі выпадкамі ўварвання метэаралагічных шароў у паветраную прастору Літвы”.
