23 снежня, Позірк. Урад Польшчы 22 снежня адкрыў беларускамоўную старонку на сваім сайце.
“Інтэрнэт-старонка для грамадзян Беларусі была падрыхтавана для асоб, якія вырашылі легальна знаходзіцца ў Польшчы і маюць патрэбу ў зразумелай, дакладнай інфармацыі адносна жыцця ў нашай краіне. Тут вы знойдзеце карысныя парады наконт афіцыйных фармальнасцей, доступу да выплат, магчымасцей працаўладкавання, вядзення гаспадарчай дзейнасці ці адукацыі дзяцей”, — гаворыцца ў прэзентацыйным тэксце на старонцы.
Адзначаецца, што “ўвесь апублікаваны змест мае афіцыйны характар і быў падрыхтаваны на падставе дзеючых прававых нормаў, а таксама інфармацыі, прадастаўленай польскімі дзяржаўнымі ўстановамі”. “Наша мэта — палягчэнне штодзённага функцыянавання і інтэграцыі грамадзян Беларусі ў Польшчы”, — падкрэслівае ўрад.
Карыстальнікам прапануюцца раздзелы “Як можна легальна знаходзіцца ў Польшчы?”, “Працэдура адкрыцця банкаўскага рахунка”, “Магчымасці працаўладкавання і дапамога ў працаўладкаванні”. Таксама можна атрымаць інфармацыю аб сямейных выплатах, пенсіях, абмене вадзіцельскага пасведчання і інш.
Стварэнне старонкі ініцыяваў намеснік кіраўніцы Аб’яднанага пераходнага кабінета, кіраўнік Народнрага антыкрызіснага ўпраўлення Павел Латушка падчас адной з сустрэч у канцылярыі прэм’ер-міністра Польшчы, паведамляе АПК. Праца над старонкай вялася паўгода. Інфармацыя будзе абнаўляцца штоквартальна.
“Гэта важны крок у кірунку падтрымкі беларусаў, якія апынуліся ў складанай жыццёвай сітуацыі”, — цытуе Латушку прэс-служба АПК.
Ён заклікаў суайчыннікаў звяртацца ў кабінет, калі яны маюць тэмы, важныя для асвятлення на беларускай старонцы ўрадавага сайта Польшчы.
