Лукашэнка паскардзіўся на закрыццё нацыянальных рынкаў краінамі ЕАЭС

21 снежня, Позірк. Пытанне выканання ў ЕАЭС “ранейшых дамоўленасцяў і агульным настроі на інтэграцыю” падняў Аляксандр Лукашэнка, выступаючы 21 снежня ў Санкт-Пецярбургу на пасяджэнні Вышэйшага Еўразійскага эканамічнага савета.

“Цяпер якраз той час, калі краіны аб’ядноўваюцца ў саюзы для таго, каб дзейнічаць больш мэтанакіравана, агрэсіўна. У нас, у Беларусі, менавіта такі настрой, таму я заклікаю вас усіх дзейнічаць на інтэграцыю”, — цытуе Лукашэнку яго прэс-служба.

Паводле слоў прамоўцы, “пры ўсіх дасягненнях” у ЕАЭС “захоўваюцца і праблемы”.

“Як бы мы тут ні казалі аб станоўчым, яны сапраўды ёсць. Мы пераглядаем базавыя дамоўленасці 2014 года, зафіксаваныя ў дагаворы аб саюзе. Пераносім тэрміны фарміравання агульных энергетычных рынкаў, лекавых сродкаў і медыцынскіх вырабаў, канстатуем негатоўнасць усіх краін далучыцца да адзінага фінансавага рынку”, — сказаў палітык.

Ён звярнуў увагу, што да “праблем з бесперашкодным перамяшчэннем тавараў ва ўзаемным гандлі дадаюцца новыя”.

“Аднабаковае закрыццё нацыянальных рынкаў ажыццяўляецца ўжо не толькі традыцыйнымі спосабамі, як гэта ў нас было раней — забарона ўвозу-вывазу або ліцэнзаванне. Для гэтага прыстасоўваюцца інструменты цыфравізацыі”, — дадаў Лукашэнка.

Беларускі бок, паводле яго сцвярджэння, ініцыяваў вырашэнне пытання “лічбавых перашкод хоць бы на ўзроўні рэкамендацый”. “Але пакуль і тут мы асабліва не прасунуліся”, — адзначыў ён.

Гандлюючы з краінамі Садружнасці Незалежных Дзяржаў у студзені — кастрычніку 2025 года Беларусь экспартавала больш тавараў, чым імпартавала, аднак з дзяржавамі па-за аб’яднання знешнегандлёвае сальда склалася для Мінска адмоўным, сведчыць праведзены “Позіркам” аналіз даных Нацыянальнага статыстычнага камітэта.

Тавараабарот з краінамі СНД за дзесяць месяцаў склаў 47 млрд 126,8 млн долараў (за аналагічны перыяд 2024-га — 46 млрд 51,6 млн; +2,33%). Аб’ём экспарту — 24 млрд 635,5 млн (24 млрд 274,3 млн; +1,49%), імпарту — 22 млрд 501,3 млн (21 млрд 777,3 млн; +3,32%); дадатнае сальда — 2 млрд 124,2 млн (2 млрд 497 млн; -14,93%).

Тавараабарот з дзяржавамі па-за СНД — 24 млрд 916,2 млн долараў (25 млрд 505,4 млн; -2,31%): экспарт — 8 млрд 754 млн (9 млрд 682,1 млн; -9,59%), імпарт — 16 млрд 162,2 млн (15 млрд 823,3 млн; +2,14%); адмоўнае сальда — 7 млрд 408,2 млн (-6 млрд 141,2 млн; +20,63%).

У цэлым знешнегандлёвы абарот тавараў Беларусі за студзень — кастрычнік 2025 года склаў 72 млрд 43 млн долараў (71 млрд 557 млн годам раней; +0,7%).

Экспарт склаўся на ўзроўні 33 млрд 379,5 млн (33 млрд 956,4 млн; -1,7%), імпарт — 38 млрд 663,5 млн (37 млрд 600,6 млн; +2,8%). Адмоўнае сальда склала 5 млрд 284,4 млн (-3 млрд 644,2 млн; рост у 1,5 раза).

Знешнегандлёвы абарот тавараў і паслуг Беларусі ў студзені — верасні 2025 года склаў 75 млрд 479,2 млн долараў — на 1,4% больш чым за аналагічны перыяд 2024-га (74 млрд 456,5 млн), сведчаць даныя Нацыянальнага банка.

Экспарт склаўся на ўзроўні 37 млрд 319,2 млн долараў (37 млрд 73,2 млн; +0,7%), імпарт — 38,16 млрд (37 млрд 383,3 млн; +2,1%). Адмоўнае сальда — 840,8 млн долараў (годам раней было -310,1 млн; рост у 2,7 раза).

У 2024 годзе знешнегандлёвы абарот тавараў і паслуг склаў 100 млрд 79,3 млн долараў — на 5,1% больш, чым за 2023-ы (95 млрд 180,8 млн). Экспарт склаўся на ўзроўні 49 млрд 385,3 млн (47 млрд 713,6 млн; +3,5%), імпарт — 50 млрд 694 млн (47 млрд 467,2 млн; +6,8%). Адмоўнае сальда — 1 млрд 308,7 млн (годам раней было дадатным — 246,4 млн).