Лукашэнка: Мабільныя аператары павінны на працягу 2026 года забяспечыць аднолькава стабільную сувязь па ўсёй Беларусі
19 снежня, Позірк. “Надзённым” назваў Аляксандр Лукашэнка пытанне надзейнасці і хуткасці сотавай сувязі. Пра гэта ён заявіў 18 снежня на VII Усебеларускім народным сходзе ў Мінску, выступаючы са штогадовым пасланнем народу і Нацыянальнаму сходу.
“Да яе ёсць пытанні па ўсёй краіне, — заявіў прамоўца. — Сямейныя выдаткі на інтэрнет ужо супастаўныя з іншымі камунальнымі плацяжамі“.
Паводле слоў Лукашэнкі, “пры сваіх немалых даходах “мабільныя аператары” павінны забяспечыць аднолькава стабільную сувязь у любым населеным пункце”, “адгаворкі больш не прымаюцца”.
Ураду даручана вырашыць гэтую праблему на працягу 2026 года. “Усе нарматыўныя акты, якія вы прасілі, я падпісаў”, — рэзюмаваў ён.
15 снежня Лукашэнка дазволіў аператарам сотавай сувязі права ажыццяўляць мікрафінансавую дзейнасць — выдаваць безнаяўныя спажывецкія мікрапазыкі без закладу ў суме, якая не перавышае 200 базавых велічынь на аднаго пазычальніка на дзень заключэння дагавора (цяпер 8.400 рублёў).
На пачатак 2025 года ў Беларусі было 11 млн 875 тыс. абанентаў сотавай рухомай электрасувязі — на 118 тыс. больш, чым годам раней. На 100 жыхароў прыходзілася 129,7 абанента (+2,5%), вынікала з апублікаванай на пачатку года справаздачы Міністэрства сувязі і інфарматызацыі аб развіцці інфармацыйна-камунікацыйнай інфраструктуры.
Паводле інфармацыі ведамства, у 2024 годзе ахоп жыхароў краіны паслугамі сотавай сувязі стандарту LTE склаў 99%. Колькасць абанентаў стацыянарнага шырокапалоснага доступу да інтэрнэту складала 3 млн 291,7 тыс.
