Мытнікі знайшлі марыхуану ў двух беларусаў, якія рухаліся з Польшчы

18 снежня, Позірк. Два факты ўвозу ў Беларусь наркотыкаў выявіла кіналагічная служба Брэсцкай мытні, паведамляе Дзяржаўны мытны камітэт (ДМК).

Паведамляецца, што 41-гадовы мінчанін накіроўваўся з Польшчы праз пункт пропуску Брэст па зялёным калідоры, “пацвярджаючы тым самым адсутнасць у яго тавараў, якія падлягаюць дэклараванню альбо забароненых і абмежаваных да ўвозу“. Аднак службовы сабака “паказаў на магчымую наяўнасць у яго такіх”. У сумцы, надзетай на ім, быў знойдзены заматаны ізастужкай скрутак з рэчывам зялёнага колеру.

Наркотык канфіскавалі мытнікі таксама ў 29-гадовага гамяльчаніна, які ехаў з Польшчы рэйсавым аўтобусам. Забароненае рэчыва выяўлена ў заплечніку мужчыны.

У абодвух выпадках праведзеныя ўпраўленнем Дзяржаўным камітэтам судовых экспертыз па Брэсцкай вобласці даследаванні “пацвердзілі, што канфіскаваныя ў грамадзян рэчывы “з’яўляюцца небяспечным наркотыкам — марыхуанай“.

“У дачыненні да грамадзян, якія мелі намер перамясціць марыхуану, распачатыя крымінальныя справы паводле ч. 1 арт. 328¹ Крымінальнага кодэкса (незаконнае перамяшчэнне праз мытную мяжу Еўразійскага эканамічнага саюза і (або) дзяржаўную мяжу Рэспублікі Беларусь наркатычных сродкаў, псіхатропных рэчываў, іх прэкурсораў або аналагаў). Максімальнае пакаранне, якое іх цяпер чакае — пазбаўленне волі на тэрмін да 7 гадоў.

За першыя шэсць месяцаў 2025 года колькасць асуджаных паводле “антынаркатычных“ артыкулаў Крымінальнага кодэкса (327-332) павялічылася на 2,9% у параўнанні з леташнім адпаведным перыядам, вынікае са звестак Вярхоўнага суда.

У студзені — чэрвені за здзяйсненне злачынстваў, звязаных з незаконным абаротам наркотыкаў, асуджана 1.092 чалавекі, за першую палову 2024-га — 1.061.

З гэтай колькасці па арт. 328 (незаконны абарот наркатычных сродкаў, псіхатропных рэчываў, іх прэкурсораў і аналагаў) асуджана 1.005 чалавек, або 92% (за той жа леташні перыяд — 1.011, або 95,3%).

Па першай частцы згаданага артыкула вінаватымі прызнана 645 асоб (64,2% асуджаных па арт. 328). З іх да абмежавання волі прыгаворана 442, да пазбаўлення волі — 79, арышту — 34, аштрафавана — 3.