18 снежня, Позірк. Два чалавекі сталі ахвярамі пажараў, якія адбыліся ў Беларусі з 6:00 17 снежня да 6:00 18 снежня, вынікае з аператыўнай зводкі Міністэрства па надзвычайных сітуацыях.
Гаспадар жылога дома 1962 года нараджэння загінуў ад агню ў аграгарадку Слабада Смалявіцкага раёна (Мінская вобласць). Шпіталізаваная яго жонка 1968 г.н.
У Баранавічах (Брэсцкая вобласць) на пажары загінула жанчына 1957 г.н.
МНС паведамляе таксама пра “выбух газапаветранай сумесі ў кватэры на сёмым паверсе дзесяціпавярховага панэльнага жылога дома ў Гомелі па вул.Косарава, 3”.
“У выніку выбуху адбылося абвальванне пліт перакрыццяў жылых пакояў з восьмага па шосты паверхі, пашкоджаная вонкавая сценавая панэль дома”, — гаворыцца ў зводцы.
З кватэр пад’езда эвакуявана 9 чалавек.
“Кіналагічнымі разлікамі Рэспубліканскага атрада спецыяльнага прызначэння “ЗУБР” праводзіліся работы па пошуку магчымых пацярпелых. Арганізавана адсяленне жыхароў трэцяга (аварыйнага) пад’езда, па выніках абследавання кватэры і двух іншых пад’ездаў дома прыдатныя для далейшага пражывання”, — удакладняе ведамства.
Адзначаецца, што “месцазнаходжанне аднаго жыхара з кватэры на шостым паверсе высвятляецца”.
Праведзеныя работы па ўмацаванні пашкоджаных канструкцый, паведамляе МНС. Псіхолагі “аказвалі дапамогу жыхарам дома”. Прычына здарэння высвятляецца.
З пачатку года, паводле звестак МНС, ахвярамі пажараў у Беларусі сталі 493 чалавекі (год таму на гэтую ж дату — 515, зніжэнне на 4,3%). Пры гэтым колькасць пажараў узрасла на 2,1% — з 5.948 да 6.072.
“Позірк” неаднаразова звяртаў увагу на тое, што МНС перыядычна карэктуе статыстыку смяротнасці на пажарах у бок змяншэння (папярэдні выпадак — 5 кастрычніка).
Згодна з тлумачэннем ведамства, часам пасля правядзення судова-медыцынскай экспертызы высвятляецца, што смерць наступіла не праз пажар. Наадварот, як заявіла МНС, узгаранне часам можа ўзнікнуць пасля таго, як чалавек памёр.
