Расійскі “Арэшнік” у Беларусі — сродак ціску на ЕС і НАТО, лічыць кіраўнік знешняй выведкі Украіны
Тры баявыя блокі ракеты комплексу "Піянер" — аднаго з папярэднікаў "Арэшніка" (Музей палігона Капусцін Яр, горад Знаменск, РФ)
13 снежня, Позірк. Служба знешняй выведкі (СЗВ) Украіны бачыць “мерапрыемствы па падрыхтоўцы і разгортванні балістычнай ракеты сярэдняй далёкасці “Арэшнік” на тэрыторыі Беларусі”, заявіў інфармагенцтву “Укрінформ” кіраўнік СЗВ Алег Івашчанка.
“Расія і Беларусь будуюць вайсковыя аб’екты для пускавой устаноўкі, сістэм назірання і сувязі, якія з’яўляюцца элементамі сістэмы “Арэшнік”. Аднак, па стане на сёння, гэтыя захады яшчэ не рэалізаваныя”, — заявіў ён. Кіраўнік выведкі дадаў, што РФ можа размясціць пускавую ўстаноўку ў Беларусі, але без завяршэння збудавання іншых элементаў яна “будзе выконваць толькі ролю макета”.
Івашчанка перакананы, што нават калі “Арэшнік” сапраўды з’явіцца ў Беларусі, Мінск “не будзе мець ніякіх правоў і паўнамоцтваў на яго прымяненне”, комплекс будзе знаходзіцца “ў адзінай сістэме кіравання Ракетных войскаў стратэгічнага прызначэння РФ”.
Паводле даных СЗВ, як сказаў кіраўнік ведамства, размяшчэнне “Арэшніка” на беларускай тэрыторыі “прадыктаванае жаданнем узмацніць шантаж Еўропы і еўрапейскіх краін, а таксама засцерагчы” гэты комплекс ад удару, паколькі “размяшчэнне гэтага ўзбраення ў еўрапейскай частцы РФ робіць яго законнай цэллю” для Украіны.
“Разгортванне “Арэшніка” на тэрыторыі Беларусі — гэта сродак ціску перш за ўсё на ЕС і НАТО, а не на Украіну, — лічыць Івашчанка. — Такі крок дазволіць Расіі пашырыць свае здольнасці для нанясення раптоўнага ўдару па сталіцы любой еўрапейскай краіны і значна зменшыць час падлёту ракет у параўнанні з запускам з палігона Капусцін Яр”.
Пра тое, што размяшчэнне “Арэшніка” ў Беларусі прадстаўляе небяспеку для Еўропы, напрыканцы кастрычніка заяўляў прэзідэнт Украіны Уладзімір Зяленскі.
12–16 верасня прайшлі маштабныя беларуска-расійскія вучэнні “Захад-2025”, падчас якіх былі адпрацаваныя “планаванне прымянення” ядзернай зброі і комплексу “Арэшнік”, а таксама супрацьпаветраная абарона, абарончыя баявыя дзеянні, падтрымка тактычнай авіяцыі ды інш.
Па выніках пасяджэння Вышэйшага дзяржсавета Саюзнай дзяржавы, якое адбылося 6 снежня 2024 года, Масква і Мінск зацвердзілі агульную канцэпцыю бяспекі і заключылі міждзяржаўны дагавор аб гарантыях бяспекі. Лукашэнка пасля пасяджэння заявіў, што папрасіў Пуціна размясціць у Беларусі расійскія балістычныя ракеты сярэдняй далёкасці “Арэшнік”. Пуцін адзначыў, што гэты ракетны комплекс можна будзе размясціць на беларускай тэрыторыі ў другой палове 2025 года.
26 студзеня 2025-га Лукашэнка заявіў журналістам, што “Арэшнік” будзе дастаўлены ў Беларусь “з дня на дзень”. Пры гэтым, кажучы пра тэрміны пастаўкі, ён паведаміў, што “гэта не гарыць”.
Паводле слоў Лукашэнкі, ён “пажартаваў”, калі раней заяўляў пра неабходнасць размясціць у Беларусі 10 такіх ракетных комплексаў. Пуцін зрабіў яму на гэты конт “заўвагу”, бо Расія не абяцала такую колькасць гэтага ўзбраення, дадаў палітык.
14 сакавіка, выступаючы ў Савеце Федэрацыі РФ, Лукашэнка сярод іншага заявіў, што Масква перадасць Беларусі некалькі ракетных комплексаў “Арэшнік” да канца года. Пускавыя ўстаноўкі да ракетнага комплексу, адзначыў ён, вырабляюць у Беларусі.
Сёлета 18 сакавіка дзяржсакратар Савета бяспекі Аляксандр Вальфовіч заявіў, што ў краіне падрыхтаваныя пляцоўкі для размяшчэння “Арэшніка”.
Упершыню пра жаданне размясціць “Арэшнік” на тэрыторыі Беларусі Лукашэнка заявіў 28 лістапада 2024 года на палях саміту АДКБ у Астане (Казахстан).
Тэма "Арэшніку" выкарыстоўваецца як частка стратэгіі інфармацыйна-псіхалагічнага ўздзеяння на Захад — ISW
1 лістапада, Позірк. Масква і Мінск працягваюць пагражаць Еўропе "магчымым будучым размяшчэннем ракетных комплексаў "Арэшнік" у Беларусі", гаворыцца ў справаздачы амерыканскага Інстытута вывучэння вайны (ISW). "ISW па-ранейшаму лічыць, што Расія выкарыстоўвае "Арэшнік" як элемент стратэгіі інфармацыйна-псіхалагічнага ўздзеяння і ядзернага ціску, …
