Ціханоўская: Я ў пастаянным кантакце з адміністрацыяй Трампа

12 снежня, Позірк. Лукашэнка пачаў вызваляць людзей, таму што адчувае ціск, а не таму, што раптоўна змяніў сваю палітыку. Такое меркаванне выказала Святлана Ціханоўская, выступаючы ў камітэце па правах чалавека Сената Італіі 11 снежня.

“Акрамя таго, ён зразумеў, што можа выкарыстоўваць людзей у якасці разменнай манеты. Ён убачыў, што можа дамагчыся пэўнага змякчэння санкцый або нават выхаду з ізаляцыі”, — сказала дэмлідар.

“Паколькі мы лічым вызваленне людзей прыярытэтам, мы таксама павінны патрабаваць спыніць рэпрэсіі, каб не было захопу новых закладнікаў. У адваротным выпадку гэта будзе падобна на дзверы, што круцяцца”, — дадала Ціханоўская.

Палітык адзначыла, што яе муж Сяргей Ціханоўскі быў вызвалены дзякуючы “гуманітарным намаганням” прэзідэнта ЗША Дональда Трампа, які “ўстанавіў высокую планку, патрабаваўшы вызваліць усіх 1.300 палітвязняў”.

“З аднаго боку, мы просім прэзідэнта Трампа працягваць свае намаганні, і я знаходжуся ў пастаянным кантакце з яго адміністрацыяй. З іншага боку, мы просім Еўрапейскі саюз захоўваць цвёрдасць сваёй пазіцыі. У той час як амерыканскія санкцыі могуць дапамагчы выратаваць жыцці, еўрапейскія санкцыі павінны спрыяць сістэмным незваротным зменам у Беларусі”, — заявіла Ціханоўская.

Яна заклікала італьянскіх парламентарыяў трымаць Беларусь у полі зроку як ва ўнутранай, так і ў знешнепалітычнай павестцы.

“Я прашу вас часцей гаварыць пра еўрапейскую будучыню Беларусі, пра тое, што Беларусь — незалежная краіна, а не расійскі задні двор”, — сказала дэмлідар.

12 снежня прэс-служба Аляксандра Лукашэнкі паведаміла пра прыезд у Мінск спецпасланніка Трампа па Беларусі Джона Коўла.

Лукашэнка папрасіў Коўла перадаць Трампу, што ў сувязі з прызначэннем Коўла на пасаду неабходна “нешта зрабіць”: “І мы зробім”.

24 лістапада на брыфінгу ў Варшаве Ціханоўская паведаміла, што правяла перамовы з Коўлам. У кантэксце далейшага вызвалення палітвязняў яна заявіла: “Мы аднолькава разумеем сітуацыю. Спадар Коўл прыкладае вялікія намаганні, каб выцягнуць нашых людзей з турмаў і дамагчыся спынення рэпрэсій. І каб людзі мелі магчымасць застацца ў Беларусі таксама. Я шчыра спадзяюся, што ў бліжэйшыя тыдні будуць добрыя навіны”.

Адначасова Ціханоўская паведаміла, што дэмсілы разам з праваабаронцамі падрыхтавалі “ўсю неабходную інфраструктуру, каб прыняць палітвязняў у Польшчы і Літве і забяспечыць іх самым неабходным”.

Раней (21 чэрвеня і 11 верасня 2025 года) пасля візітаў Коўла (тады ён быў намеснікам спецпасланніка Трампа па Украіне Кіта Келага) адбывалася вызваленне груп палітвязняў з наступным вывазам з краіны.