Пракуратура пацвердзіла прысуд Верамейчыку

3 снежня, Позірк. Былы баец палка імя Кастуся Каліноўскага Васіль Верамейчык прысуджаны да 13 гадоў пазбаўлення волі ва ўмовах узмоцненага рэжыму, паведаміла Генеральная пракуратура.

Адзначаецца, што ў склад ПКК Верамейчык уваходзіў з сакавіка да канца чэрвеня 2022 года. “Займаў розныя кіруючыя пасады ў адным з яго падраздзяленняў — батальёне “Волат”. Прымаў без упаўнаважання дзяржавы сваёй грамадзянскай прыналежнасці ўдзел у ваенным канфлікце і ваенных дзеяннях на тэрыторыі Украіны, а таксама вербаваў іншых грамадзян для такога ўдзелу”, — заяўляецца ў паведамленні.

Таксама Верамейчык “аказваў садзейнічанне экстрэмісцкай дзейнасці” ў складзе “экстрэмісцкіх фарміраванняў” Каардынацыйная рада і яе фракцыі “Блок Пракоп’ева-Ягорава”, гаворыцца ў рэлізе. Такім чынам, як сцвярджаецца, ён стаў “удзельнікам змовы з мэтай захопу дзяржаўнай улады неканстытуцыйным шляхам”.

Акрамя гэтага, Верамейчык “неаднаразова выказваў пагрозы фізічным гвалтам і абразы, у тым ліку ў сетцы інтэрнэт, на адрас службовых асоб органаў пракуратуры, унутраных спраў і суддзяў, а таксама публічна абражаў прэзідэнта Рэспублікі Беларусь”, адзначае ведамства.

Пры гэтым сцвярджаецца, што ў рамках дасудовага пагаднення аб супрацоўніцтве экс-добраахвотнік “актыўна дапамагаў ва ўстанаўленні датычных да дзейнасці злачыннай арганізацыі”.

Таксама Генпракуратура паведаміла, што “гэтым жа прыгаворам” асуджаны іншы былы баец ПКК Васіль Грачыха. Тэрмін пакарання ведамства не ўказала.

Пра тое, што Верамейчык асуджаны на 13 гадоў зняволення, паведамлялася 28 лістапада.

У лістападзе 2024 года стала вядома, што Верамейчык быў дастаўлены ў Беларусь пад канвоем. Паводле інфармацыі яго паплечнікаў па КР, мужчына быў затрыманы 13 лістапада ў Хашыміне (В’етнам).

Верамейчык у 2020 годзе ўдзельнічаў у пратэстах у Беларусі, затым пераехаў ва Украіну, дзе пасля пачатку поўнамаштабнага ўварвання расійскіх войскаў і стварэння палка Каліноўскага служыў намеснікам камандзіра батальёна “Волат”. Быў паранены, мае ўзнагароды.

З інфармацыі на сайце праваабарончага цэнтра “Вясна” вынікае, што за ўдзел у пратэстах у дачыненні да Верамейчка была ўзбуджаная крымінальная справа паводле арт. 366 КК (гвалт альбо пагроза ў дачыненні да службовай асобы, якая выконвае службовыя абавязкі, ці іншай асобы, якая выконвае грамадскі абавязак).

У 2024 годзе, пасля заканчэння службы, Верамейчык быў абраны ў КР і стаў сузаснавальнікам Асацыяцыі беларускіх ветэранаў.

Паводле звестак “Позірку”, пасля адмовы Літвы ў прадстаўленні права на жыхарства Верамейчык у кастрычніку 2024 года беспаспяхова спрабаваў трапіць у Грузію з Турцыі.

Літва прызнала яго пагрозай нацыянальнай бяспецы праз тое, што ў 2010–2016 гадах ён служыў у беларускім войску. Яму выдалі забарону на ўезд у ЕС на 30 месяцаў.

27 лістапада 2024 года праваабаронцы прызналі былога добраахвотніка палітвязнем.

1 снежня стала вядома, што разам з Верамейчыкам Грачыха асуджаны на пяць гадоў пазбаўлення волі.

Паводле звестак праваабаронцаў, мужчын абвінавачвалі паводле 12 артыкулаў Крымінальнага кодэкса: ч. 1 і 2 арт. 285 (стварэнне злачыннай арганізацыі альбо ўдзел у ёй); арт. 290³ (праходжанне навучання ці іншай падрыхтоўкі для ўдзелу ў тэрарыстычнай дзейнасці); ч. 1 арт. 342 (арганізацыя і падрыхтоўка дзеянняў, што груба парушаюць грамадскі парадак, альбо актыўны ўдзел у іх); ч. 1 арт. 357 (змова ці іншыя дзеянні, здзейсненыя з мэтай захопу дзяржаўнай улады); ч. 1 і 3 арт. 361¹ (стварэнне экстрэмісцкага фармавання альбо ўдзел у ім); ч. 2 арт. 361³ (удзел на тэрыторыі замежнай дзяржавы ва ўзброеным канфлікце); ч. 1 і 2 арт. 361⁴ (садзейнічанне экстрэмісцкай дзейнасці); арт. 364 (гвалт альбо пагроза прымянення гвалту ў дачыненні да супрацоўніка органаў унутраных спраў); ч. 1 арт. 368 (абраза прэзідэнта); арт. 369 (абраза прадстаўніка ўлады); арт. 389 (пагроза ў дачыненні да суддзі ці народнага засядацеля); арт. 391 (абраза суддзі ці народнага засядацеля).