Літва можа звярнуцца да Ізраіля па дапамогу ў абароне паветранай прасторы — дарадца Наўседы

2 снежня, Позірк. У сувязі з ростам напружанасці на мяжы праз метэазонды з кантрабандай з Беларусі Літва можа звярнуцца да Ізраіля па “досвед абароны паветранай прасторы”, заявіў дарадца прэзідэнта Гітанаса Наўседы Марус Чэснулявічус.

“Нам варта абмяркоўваць [гэтую праблему] не толькі з кампаніямі, але і са службамі, — цытуе чыноўніка Delfi. — Бо маніторынг, кантроль і абарона паветранай прасторы — гэта складаная задача, якая патрабуе не толькі інструментаў і платформаў, але і мноства ведамстваў, а таксама міжведамаснага супрацоўніцтва. У сувязі з гэтым Ізраіль можа стаць адным з варыянтаў, бо краіна сапраўды шмат інвеставала, і было б неразумна не пагаварыць з тымі, хто валодае досведам у гэтай сферы. Ідзе гаворка не абавязкова пра барацьбу з шарамі, але любая дапамога будзе вельмі карысная”.

1 снежня кіраўніца Еўрапейскай камісіі Урсула фон дэр Ляйен па выніках тэлефоннай размовы з прэзідэнтам Літвы Гітанасам Наўседам заявіла, што ЕС рыхтуе “далейшыя меры ў рамках свайго рэжыму санкцый”.

“Сітуацыя на мяжы з Беларуссю пагаршаецца, пачасціліся выпадкі ўварвання кантрабандных паветраных шароў у паветраную прастору Літвы, — адзначыла яна. — Падобная гібрыдная атака з боку рэжыму Лукашэнкі абсалютна непрымальная. Мы па-ранейшаму цалкам салідарныя з Літвой”.

Наўседа, як паведаміла яго прэс-служба, выказаў падзяку “за падтрымку ў рэагаванні на апошнія падзеі на літоўска-беларускай мяжы і гібрыдныя атакі, якія ажыццяўляюцца Беларуссю з выкарыстаннем метэазондаў і пагрозамі канфіскоўваць грузавыя аўтамабілі, зарэгістраваныя ў Еўрапейскім саюзе”.

Генеральная пракуратура Літвы 1 снежня пачала расследаванне па факце аказання дапамогі іншай дзяржаве ў дзеяннях, накіраваных супраць краіны. Ідзецца пра кантрабанду цыгарэт з Беларусі з дапамогай паветраных шароў.

Як паведамляў “Позірк”, 30 лістапада стала вядома пра чарговыя “часовыя абмежаванні паветранай прасторы” над аэрапортам Вільні.

Пасля аднаўлення працы памежных пераходаў Літва ўжо пяць разоў прыпыняла працу аэрапорта ў Вільнюсе праз новыя метэазонды, якія ўрываліся ў паветраную прастору краіны з тэрыторыі Беларусі.

У канцы кастрычніка Вільнюс закрыў пункты пропуску Мядзінінкай (з беларускага боку — Каменны Лог) і Шальчынінкай (Беняконі), дамагаючыся такім чынам рэакцыі Мінска на масавы прылёт з Беларусі паветраных шароў з кантрабандай, што перашкаджалі ў тым ліку грамадзянскай авіяцыі Літвы.

Памежныя пераходы аднавілі працу 20 лістапада. За тры тыдні, пакуль яны былі закрытыя, рэжым Лукашэнкі паспеў узмацніць правілы знаходжання ў краіне літоўскага грузавога транспарту, увязаўшы іх з працай пунктаў пропуску. У Беларусі захрасла каля 1,3 тыс. зарэгістраваных у Літве грузавікоў, якія не могуць выехаць з краіны нават пры адкрытай мяжы.

Пры гэтым Мінск настойвае, што далейшыя перамовы з Вільнюсам па гэтым пытанні павінны весціся на палітычным узроўні, Літва (прынамсі публічна) імкнецца гэтага пазбегнуць. Такія кантакты, на думку ўладаў балтыйскай дзяржавы, будуць азначаць легітымацыю беларускага рэжыму.