Кандыдатура генеральнага сакратара АДКБ на 2026–2029 гады будзе разгледжаная 27 лістапада
24 лістапада, Позірк. Кандыдатура генеральнага сакратара Арганізацыі Дагавора аб калектыўнай бяспецы (АДКБ) на 2026–2029 гады будзе разгледжаная на сесіі Савета калектыўнай бяспекі 27 лістапада ў Бішкеку (Кыргызстан), паведамляе прэс-служба ваенна-палітычнага блока.
Плануецца таксама прыняць дэкларацыю з адлюстраваннем “кансалідаваных пазіцый” дзяржаў — членаў АДКБ па “актуальных пытаннях бяспекі”. Чакаецца, што на сесіі будуць абвешчаныя прыярытары старшынства Расіі ў арганізацыі ў 2026 годзе.
У той жа дзень адбудзецца сумеснае пасяджэнне Савета міністраў замежных спраў, Савета міністраў абароны і Камітэта сакратароў саветаў бяспекі АДКБ. На ім плануецца абмеркаваць “актуальныя пытанні сумеснай працы”, у тым ліку “ўмацаванне супрацы ў сферы супрацьдзеяння незаконнаму абароту наркотыкаў і незаконнай міграцыі”.
З 1 студзеня 2023 года генеральным сакратаром АДКБ з’яўляецца прадстаўнік Казахстана Імангалі Тасмагамбетаў, які раней займаў пасаду міністра абароны, а пасля ўзначальваў казахстанскае дыпламатычнае прадстаўніцтва ў Расіі. На пасадзе кіраўніка сакратарыята ваенна-палітычнага блока Тасмагамбетаў змяніў прадстаўніка Беларусі — былога дзяржсектарара Савета бяспекі Станіслава Зася.
Як паведамляў “Позірк”, у 2026 годзе на тэрыторыі Беларусі пройдуць спецыяльныя вучэнні АДКБ “Бар’ер-2026”. Начальнік войскаў радыяцыйнай, хімічнай і біяабароны (РХБ) Генштаба Ўзброеных сіл Вячаслаў Старкоў, які анансаваў іх, заявіў, што ў рамках манеўраў будзе працягнутая “практыка сумеснага выканання задач па ліквідацыі біялагічных пагроз у інтарэсах Калектыўных міратворчых сіл” АДКБ.
У АДКБ уваходзяць Арменія, Беларусь, Казахстан, Кыргызстан, Расія і Таджыкістан. Разам з тым армянскія ўлады замарозілі ўдзел краіны ў арганізацыі і заяўляюць пра магчымы выхад з блока. Ерэван абвінавачвае арганізацыю ў бяздзейнасці падчас карабахскага канфлікту з Азербайджанам, а асобных членаў — у тым, што яны “планавалі вайну” супраць Арменіі разам з Баку.
