У Польшчы распачаўся новы 60-дзённы тэрмін, калі на мяжы з Беларуссю не прымаюць просьбы пра прытулак
22 лістапада, Позірк. Новы 60-дзённы тэрмін, на працягу якога Польшча не прымае ад замежнікаў на мяжы з Беларуссю заявы пра наданне прытулку, распачаўся 22 лістапада.
Абмежаванні падоўжаныя ў адпаведнасці з распараджэннем польскага ўрада, якое прэм’ер-міністр Дональд Туск падпісаў 18 лістапада.
Як паведамляў “Позірк”, пераважная большасць дэпутатаў Сейма Польшчы на пасяджэнні 7 лістапада падтрымала прапанову ўрада падоўжыць абмежаванне права замежнікаў звяртацца на мяжы з Беларуссю з хадайніцтвам пра наданне прытулку.
Урад тады аргументаваў сваю прапанову тым, што прычыны, з якіх было ўведзенае абмежаванне, не выпраўленыя: “Нягледзячы на пастаяннае і комплекснае ўзмацненне сіл і сродкаў, а таксама тэхнічнае забеспячэнне ў выглядзе мадэрнізацыі агароджы на мяжы з Беларуссю, захоўваецца міграцыйны ціск значнага маштабу, што робіць неабходным прыняцце мер для стабілізацыі ўнутранай сітуацыі ў Польшы”.
“У выніку агрэсіўных паводзін мігрантаў, якіх актыўна падтрымліваюць прадстаўнікі беларускіх службаў, пагроза бяспецы супрацоўнікаў і салдат, што нясуць службу на ўчастку мяжы з Беларуссю, захоўваецца”, — лічыць орган выканаўчай улады.
На пачатку 2025 года папярэдні прэзідэнт Польшчы Анджэй Дуда падпісаў закон, які дазваляе не прымаць заявы пра наданне міжнароднай абароны на асобных участках мяжы, якія вызначае ўрад. Парламент падтрымаў гэты дакумент напрыканцы лютага.
Права замежнікаў прасіць на мяжы з Беларуссю пра наданне прытулку было абмежаванае распараджэннем урада ад 27 сакавіка. Пасля рашэнне падаўжалася ў траўні, ліпені, верасні і цяпер — у лістападзе.
Міграцыйны крызіс на мяжы Беларусі і краін ЕС цягнецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.
Аляксандр Лукашэнка неаднаразова заяўляў, што беларускія пагранічнікі не будуць спыняць нелегальных мігрантаў, якія накіроўваюцца у Еўрасаюз праз Беларусь, бо іх туды нібыта “паклікалі”.
Апошняе выказванне прагучала 28 кастрычніка на ІІІ Мінскай міжнароднай канферэнцыі па еўразійскай бяспецы. Палітык заявіў, што ў Беларусі няма прычын, каб “абараняць Еўрапейскі саюз, Еўропу ад мігрантаў”.
Пасля двухдзённай паўзы зноў зафіксаваныя спробы нелегальна трапіць з Беларусі ў ЕС
21 лістапада, Позірк. Два дні доўжыўся спакой на мяжы Беларусі і Еўрасаюза. 20 лістапада Польшча і Латвія зноў зафіксавалі спробы незаконнага пераходу на сваю тэрыторыю, сведчыць праведзены “Позіркам“ аналіз аператыўных звестак іх памежных службаў. Латвія паведаміла пра 16 спробаў, Польшча заявіла, што на яе …
