Прэм’ер Літвы не выключыла паўторнага закрыцця мяжы з Беларуссю

21 лістапада, Позірк. “Скрайняй мерай” і “адказам на метэазонды” назвала закрыццё мяжы з Беларуссю прэм’ер-міністр Літвы Інга Ругінене.

Паводле яе слоў, якія перадае партал Delfi, метэазонды з Беларусі “мэтанакіравана былі накіраваныя ў бок аэрапорта”. “Мы кажам, што сёння бачым, што можам адкрыць межы, але не выключаем магчымасці паўторнага закрыцця межаў на нявызначаны тэрмін, калі сітуацыя зменіцца ў горшы бок”, — сказала Ругінене.

Прэм’ер адзначыла, што метэазонды сталі для Літвы “новай рэальнасцю”. Аднак, “перабудаваўшы алгарытмы”, літоўскі бок “усё радзей” закрывае аэрапорты, дадала яна.

“Я ясна дала зразумець учора і пазаўчора: адным толькі адкрыццём або закрыццём мы рэзка не адключым метэазонды. Кожны раз, калі мы гаворым аб гэтым пытанні, ёсць шмат стратэгічных дзеянняў”, — падкрэсліла кіраўнік урада.

Пункты пропуску Мядзінінкай і Шальчынінкай на літоўска-беларускай мяжы аднавілі працу апоўначы 20 лістапада (у 1:00 па мінскім часе).

Вільнюс закрыў пагранпераходы ў канцы кастрычніка, дабіваючыся такім чынам рэакцыі Мінска на масавыя прылёты з Беларусі паветраных шароў з кантрабандай, якія перашкаджалі ў тым ліку грамадзянскай авіяцыі Літвы.

Пры гэтым пасля адкрыцця мяжы зафіксаваны новы інцыдэнт, праз які часова закрываўся аэрапорт Вільнюса.