Агульны інфляцыйны ціск у Беларусі слабее — ЕАБР
17 лістапада, Позірк. Пра паслабленне агульнага інфляцыйнага ціску ў Беларусі сведчыць “запаволенне росту ўстойлівага кампанента цэн”, гаворыцца ў штотыднёвым макрааглядзе Еўразійскага банка развіцця (ЕАБР).
Аргументуючы гэта сцвярджэнне, аналітыкі звярнулі ўвагу на тое, што базавая інфляцыя знізілася з 7,5% у верасні да 7,1% у кастрычніку (тут і далей у гадавым вымярэнні).
У мінулым месяцы, адзначылі эксперты, інфляцыя ў цэлым склала 6,9% — пасля 7,1% у верасні. Запаволенне адбываецца трэці месяц запар.
ЕАБР канстатаваў, што знізіліся тэмпы росту цэн на нехарчовыя тавары (да 2,5% у кастрычніку пасля 2,9% у верасні), а таксама ў сектары паслуг (да 7,6% пасля 7,9% адпаведна).
Інфляцыя на харчовыя тавары захавалася на ўзроўні 9,8%. Пры гэтым паскарэнне росту коштаў на сезонную гародніну і садавіну (да 10,1% пасля 7,6%) “стрымлівае запаволенне харчовай інфляцыі”, падкрэсліваюць аналітыкі.
Тэндэнцыю інфляцыі, якая ўсё расце, “неабходна пераламаць”, заявіў Аляксандр Лукашэнка 9 верасня на нарадзе з апаратам Нацыянальнага банка і кіраўніцтвам банкаў.
Эканоміка Беларусі пры адсутнасці моцных знешніх шокаў “працягне функцыянаваць у стане перагрэтага залішняга ўнутранага попыту”, вынікала з агляду манетарнага асяроддзя за другі квартал 2025 года, прадстаўленага даследчым цэнтрам BEROC.
Старшы навуковы супрацоўнік даследчага цэнтра BEROC Анатоль Харытончык на брыфінгу 25 чэрвеня адзначыў, што інфляцыя “пачынае тэставаць гранічныя ўзроўні, якія ўлады краіны гатовыя дазволіць для кароткатэрміновага стымулявання росту ВУП з дапамогай залішне мяккай эканамічнай палітыкі — 7–9% у гадавым вылічэнні па выніках 2025”.
