Дыскусія пра будучыню Беларусі адбудзецца 19 лістапада ў Лондане, выступіць Ціханоўская

15 лістапада, Позірк. Дыскусія “Будучыня Беларусі ў мірнай Еўропе” адбудзецца 19 лістапада ў лонданскім Доме Еўропы — офісе дэлегацыі Еўрапейскага саюза ў Вялікабрытаніі, вынікае з паведамлення прадстаўніцтва ЕС.

Спікер — Святлана Ціханоўская, якая ў анонсе названая “лідарам беларускага дэмакратычнага руху, што знаходзіцца ў выгнанні”.

Арганізатарамі дыскусіі выступаюць прадстаўніцтва ЕС у Вялікабрытаніі і Centre for European Reform — брытанскі аналітычны цэнтр, які спецыялізуецца на еўрапейскай палітыцы.

13 лістапада ў Лондане Ціханоўскай была ўручаная Прэмія Магніцкага ў галіне правоў чалавека, прысуджаная ў намінацыі “Выбітны апазіцыйны палітык” (муж дэмлідара Сяргей Ціханоўскі, які падзяліў з ёй узнагароду, на цырымонію не трапіў праз адсутнасць брытанскай візы).

Прэмія заснаваная ў 2015 годзе кіраўніком інвестыцыйнага фонду Hermitage, брытанскім бізнесменам Білам Браўдэрам у гонар расійскага юрыста Сяргея Магніцкага, які памёр у маскоўскім СІЗА “Матроская цішыня” ў 2009-м ва ўзросце 37 гадоў. Магніцкі быў арыштаваны пасля выкрыцця ім маштабных крадзяжоў бюджэтных сродкаў чыноўнікамі і супрацоўнікамі сілавых структур РФ.