За дзесяць месяцаў 2025 года МАЗ прадаў на рынку РФ у 1,8 раза менш новых грузавікоў, чым за той жа леташні перыяд
12 лістапада, Позірк. У кастрычніку 2025 года на расійскім рынку прададзена 335 новых грузавікоў Мінскага аўтамабільнага завода — на 42,7% менш, чым за той жа месяц 2024-га (585), гаворыцца ў даследаванні “АСМ-холдынг” (РФ).
Прадукцыя МАЗа ў мінулым месяцы заняла 6-е месца ў спісе самых прадаваных брэндаў гэтага сегмента аўтарынка Расіі, канстатавалі эксперты (у студзені, лютым і сакавіку было 6-е, у красавіку прадпрыемства дзяліла 5–6-е, траўні — 4-е, чэрвені, ліпені і жніўні — 7-е). Доля на рынку склала 5,2% (у верасні — 5%).
Лідарамі продажаў у справаздачным месяцы сталі КамАЗ — 1.675 (-34,1% да кастрычніка 2024-га), SITRAK — 1.182 (-39,7%), FAW — 574 (-48,2%).
За дзесяць месяцаў 2025 года беларускае прадпрыемства рэалізавала на рынку РФ 2.595 грузавікоў (4.680; -44,6%, падзенне ў 1,8 раза).
За 2024 год МАЗ збыў у РФ 5.719 адзінак гэтай тэхнікі (за 2023 год — 6.406; -10,7%).
Пяцёрка лідараў продажаў па выніках 2024-га: КамАЗ (23.121; -26,5% да ўзроўню продажаў 2023-га), SITRAK (19.376; -19,2%), Shacman (15.545; -25,6%), FAW (11.680; -26,3%), Dongfeng (9.990; рост у 2,1 раза).
Буйныя прамысловыя прадпрыемствы — БелАЗ, БМЗ, МТЗ, МАЗ, а таксама канцэрны “Белнафтахім” і “Беллеспаперапрам” не выканалі заданні па пастаўках прадукцыі ў Расію. Пра гэта, як паведамляла беларуская амбасада ў Маскве, ішла размова 10 верасня на пасяджэнні міжведамаснай рабочай групы па ажыццяўленні маніторынгу сітуацыі з пастаўкамі ў РФ.
“Нягледзячы на дадатную дынаміку тэмпаў росту экспарту, адзначаныя негатыўныя тэндэнцыі па асобных таварных групах, невыкананне экспартных заданняў асобнымі дзяржаўнымі органамі і прадпрыемствамі”, — гаварылася ў паведамленні.
Аляксандр Лукашэнка сёлета 31 ліпеня на нарадзе з кіраўнікамі беларускіх дыпламатычных прадстаўніцтваў выказаў незадаволенасць тым, што на расійскі рынак “трапляюць тавары з трэціх краін без усялякай лакалізацыі”, выціскаючы беларускую прадукцыю.
15 чэрвеня 2023 года першы віцэ-прэм’ер Беларусі Мікалай Снапкоў заявіў, што рынак аўтатэхнікі Саюзнай дзяржавы “мае патрэбу ў аператыўным прыняцці спецыяльных ахоўных мер праз актыўную экспансію кітайскіх вытворцаў”.
