Сезонная прадукцыя ў кастрычніку падаражэла на 10,1% — Нацбанк
11 лістапада, Позірк. Базавая інфляцыя (не ўлічвае сезонныя тавары, а таксама тавары і паслугі, цэны на якія часта змяняюцца ў кароткатэрміновай перспектыве або рэгулююцца дзяржавай) у кастрычніку 2025 года склала 7,1% (тут і далей у гадавым вымярэнні), вынікае з апублікаванага Нацыянальным банкам агляду інфляцыйных працэсаў.
У верасні гэты паказчык быў роўны 7,5%, у жніўні — 7,7%.
Рост цэн на плодаагароднінную прадукцыю (сезонныя тавары) у мінулым месяцы паскорыўся да 10,1% (+7,5% і +6,6% адпаведна).
Рост рэгуляваных дзяржавай цэн і тарыфаў склаў 5,9% (+6%, +5,9%).
Агрэгаваны паказчык трэндавай інфляцыі (індыкатар інфляцыі, вычышчаны ад уплыву рознага роду шокаў) вырас на 6,2% (+6,3% і +6,3%).
Спажывецкія цэны ў кастрычніку 2025 года выраслі на 0,3%, у параўнанні са снежнем 2024 года —на 6,1%, у гадавым вымярэнні (да кастрычніка 2024 года) — на 6,9%.
Міністэрства антыманапольнага рэгулявання і гандлю пастановай № 4 ад 27 студзеня вызначыла паказчыкі штомесячнага (з нарастаннем) дапушчальнага павелічэння коштаў: у студзені цэны не павінны былі вырасці больш чым на 0,7% (фактычна — +0,7%), паводле вынікаў студзеня — лютага — на 1,9% (+2%), студзеня — сакавіка — на 2,2% (+2,8%), студзеня — красавіка — на 2,7% (+3,8%), студзеня — траўня — на 3% (+4,5%), студзеня — чэрвеня — на 3,3% (+5,4%), студзеня — ліпеня — на 3,4% (+5,6%), студзеня — жніўня — на 3,4% (+5,3%), студзеня — верасня — на 3,7% (+5,8%), студзеня — кастрычніка — на 4,1% (+6,1%).
Далей: студзень — лістапад — 4,4%, студзень — снежань — 5% (гэтая адзнака з’яўляецца зацверджанай Аляксандрам Лукашэнкам на 2025 год).
Тэндэнцыю росту інфляцыі “неабходна пераламаць”, заявіў Лукашэнка 9 верасня на нарадзе з апаратам Нацыянальнага банка і кіраўніцтвам банкаў.
На яго думку выступоўцы, роля Нацбанка ў гэтым працэсе “наогул пакуль слаба прасочваецца“.
“Нізкая інфляцыя патрэбная нашым прадпрыемствам для планавання доўгатэрміновых інвестыцый, — падкрэсліў Лукашэнка. — А людзям — для таго, каб не падала іх пакупніцкая здольнасць і не абясцэньваліся даходы і зберажэнні“.
Гаворачы аб асноўных задачах для банкаўска-фінансавай сістэмы, ён заявіў, што важна “забяспечыць фінансавую стабільнасць”.
Эканоміка Беларусі пры адсутнасці моцных знешніх шокаў “працягне функцыянаваць у стане перагрэтага залішняга ўнутранага попыту”, вынікала з агляду манетарнага асяроддзя за другі квартал 2025 года, прадстаўленага даследчым цэнтрам BEROC.
На думку экспертаў, гэта будзе суправаджацца высокай гадавой інфляцыяй, якая “можа наблізіцца да верхняй мяжы дыяпазону 7-9% да канца бягучага года”.
Старшы навуковы супрацоўнік даследчага цэнтра BEROC Анатоль Харытончык на брыфінгу 25 чэрвеня адзначыў, што інфляцыя “пачынае тэставаць гранічныя ўзроўні, якія ўлады краіны гатовыя дапусціць для кароткатэрміновага стымулявання росту ВУП з дапамогай залішне мяккай эканамічнай палітыкі — 7-9% у гадавым вымярэнні па выніках 2025 года“.
