Рассельгаснагляд вярнуў у Беларусь чарговую партыю паддонаў

10 лістапада, Позірк. Аб спыненні чарговага нелегальнага ўвозу на тэрыторыю Расіі драўляных паддонаў з Беларусі паведаміла 10 лістапада Федэральная служба па ветэрынарным і фітасанітарным наглядзе (Рассельгаснагляд).

Адзначаецца, што на мінулым тыдні спецыялісты ведамства “ажыццявілі кантроль затрыманага пры руху з боку Рэспублікі Беларусь транспартнага сродку з вырабамі з драўніны”.

“Падчас надгляду грузавога адсека інспектары ўстанавілі, што ў аўтамабілі знаходзілася 700 драўляных паддонаў, якія суправаджаліся несапраўдным фітасанітарным сертыфікатам. Пасля правядзення ўсіх неабходных праверачных мерапрыемстваў у адпаведнасці з дзейным заканадаўствам падкаранцінная прадукцыя высокай фітасанітарнай рызыкі была вернутая на тэрыторыю Рэспублікі Беларусь”, — адзначаецца ў рэлізе.

У верасні Рассельгаснагляд паведамляў аб спыненні нелегальнага ўвозу на тэрыторыю Расіі 375 драўляных паддонаў з Беларусі.