Па факце спробаў вярбоўкі супрацоўнікаў НАУ пракуратура Варшавы ўзбудзіла крымінальную справу — Латушка

9 лістапада, Позірк. Па факце спробаў вярбоўкі супрацоўнікаў Народнага антыкрызіснага ўпраўлення (НАУ) спецслужбамі беларускага рэжыму Акруговая пракуратура Варшавы ўзбудзіла крымінальную справу, паведаміў кіраўнік НАУ, намеснік кіраўніцы Аб’яднанага пераходнага кабінета Павел Латушка.

8 лістапада Латушка атрымаў адпаведнае апавяшчэнне з аддзела вайсковых спраў пракуратуры.

Справа заведзеная 23 кастрычніка “па факце накіравання ў перыяд з 27 па 31 ліпеня 2025 года не менш за 10 супрацоўнікам НАУ паведамленняў з прапановамі аб супрацоўніцтве са спецслужбамі Беларусі, якія выявіліся ў шантажы, спробах подкупу і фінансавай падтрымкі, прапаноў пачаць усё з “чыстага ліста” і г.д.”.

Гэтыя дзеянні кваліфікуюцца як дзеянні супраць Рэспублікі Польшча, справа распачатая паводле артыкула за шпіянаж. Вінаватым пагражае ад 5 да 30 гадоў пазбаўлення волі.

Пра спробы вярбоўкі Латушка паведаміў на прэс-канферэнцыі 31 ліпеня. У рамках працэдуры дазнання 1 кастрычніка ён даў паказанні.

“Узбуджэнне крымінальнай справы Акруговай пракуратурай у Варшаве пацвярджае сур’ёзнасць і маштабнасць дзеянняў спецслужбаў рэжыму, накіраваных на супрацьдзеянне дзейнасці дэмакратычных структур Беларусі і актывістаў, а таксама стварэнне пагроз бяспецы Рэспублікі Польшча”, — заявіў Латушка.

Ён звярнуўся да грамадзян Беларусі, якія “церпяць пераслед і пагрозы з боку спецслужбаў рэжыму на тэрыторыі Польшчы”, паведамляць пра гэта ў Акруговую пракуратуру Варшавы — для абагульнення інфармацыі і расследавання ў рамках адной крымінальнай справы, што спросціць збор доказаў і следства.