Літоўскія памежнікі вылавілі з Нёмана два плыты з цыгарэтамі з Беларусі
8 лістапада, Позірк. Два плыты з кантрабанднымі цыгарэтамі з Беларусі вылавілі з ракі Нёман літоўскія памежнікі, паведамляе Памежная служба краіны.
Гэта адбылося ў ноч на 7 лістапада каля прымежнай в. Швяндубрэ (Алітускі павет). Канфіскавана каля тысячы пачкаў цыгарэт “Minsk Сapital QS” коштам звыш 4,8 тыс. еўра.
Аб’екты былі абсталяваныя GPS-прыборамі для сачэння.
“Апошнім часам пагранічнікі рэдка сутыкаюцца з такім спосабам перавозкі беларускіх цыгарэт”, — гаворыцца ў рэлізе.
За 10 месяцаў 2025 года кантрабанда цыгарэт праз памежныя воды была ажыццёўлена 24 разы (за аналагічны перыяд 2024 года — 31), адзначае Памежная служба Літвы.
“Усяго было ўвезена больш за 104 тысячы пачкаў цыгарэт. Гэта колькасць павялічылася ў сувязі з маштабным затрыманнем у маі, калі, паводле звестак аператыўна-вышуковай дзейнасці, было затрымана 80 тысяч пачкаў цыгарэт, правезеных пагранічнымі водамі”, — удакладняе прэс-служба ведамства.
Апошнім часам для кантрабанды цыгарэт у Літву паветраным шляхам актыўна выкарыстоўваюцца метэазонды. Вільнюс абвінавачвае ў арганізацыі канала Мінск.
Гэта стала падставай закрыцця Літвой мяжы з Беларуссю.
