Беларусь адзначае 7 лістапада “разам з Прыднястроўем” — дзяржСМІ

7 лістапада, Позірк. Сайт газеты “СБ. Беларусь сегодня” (заснавальнік — Адміністрацыя прэзідэнта) адзначыў непрызнанае Прыднястроўе як саюзніка Мінска ў святкаванні Дня Кастрычніцкай рэвалюцыі.

У матэрыяле аб ускладанні кветак да помніка Леніна на пл. Незалежнасці ў Мінску з удзелам за аўтарствам прапагандыста Максіма Осіпава гаворыцца, што “Беларусь з’яўляецца адзінай на постсавецкай прасторы (разам з Прыднястроўем), дзе дзень 7 лістапада адзначаецца на дзяржаўным узроўні”.

У мерапрыемстве прынялі ўдзел “члены Камуністычнай партыі Беларусі, дэпутаты Палаты прадстаўнікоў <…> і Мінскага гарадскога Савета дэпутатаў, прадстаўнікі дыпламатычнага корпуса шэрагу краін, актывісты грамадскіх арганізацый і аб’яднанняў, школьнікі, студэнты“, а таксама “ветэраны, пенсіянеры“ і нібыта “простыя гараджане“.

Дзень Кастрычніцкай рэвалюцыі з’яўляецца дзяржаўным святам. Беларусь — адзіная постсавецкая дзяржава, дзе яна адзначаецца (адноўлены рашэннем Аляксандра Лукашэнкі ў 1995 годзе).

У яго актуальным віншаванні сцвярджаецца, што “зароджаная ў кастрычніку 1917 года <…> мадэль сацыяльнай дзяржавы сфармавала трывалы падмурак для развіцця” Беларусі.

Прыднястроўская Малдаўская Рэспубліка (Прыднястроўе) — непрызнаная дзяржава, абвешчаная ў 1990 годзе на міжнародна прызнанай тэрыторыі Малдовы. Увесь гэты час актыўна падтрымліваецца Крамлём. У яго ўзброены канфлікт з Малдовай у 1992 годзе ўмяшалася РФ — афіцыйна як міратворац.

Дыпламатычныя адносіны паміж Беларуссю і Малдовай устаноўлены ў 1992 годзе. Мінск афіцыйна не прызнае Прыднястроўе.

Адносіны ўладаў з Кішынёвам астудзіліся пасля прыходу да ўлады ў Малдове па-праеўрапейску настроеных сіл на чале з Маяй Санду (прэм’ер-міністр у 2019 годзе і прэзідэнт з 2020-га). Кантакты з ёй падтрымліваюць дэмсілы на чале са Святланай Ціханоўскай.

Менск развівае кантакты з прарасейскімі сіламі. У ліпені Лукашэнка прымаў кіраўніка Партыі сацыялістаў Ігара Дадона.