5 лістапада, Позірк. Афіцыйны Вільнюс прадставіў свае прапановы пра тое, як павінны выглядаць новыя санкцыі, што прымяняюцца да Беларусі на міжнародным узроўні, заявіў журналістам 5 лістапада міністр замежных спраў Літвы Кястуціс Будрыс.
“Мы прадставілі свой пакет прапаноў, які ўтрымлівае як канкрэтныя фармулёўкі, так і эфект, — цытуе кіраўніка МЗС партал навін Delfi. — Літва не навічок у тэме санкцый. І пакеты мер, і прадстаўленыя намі аргументы ўспрымаюцца ўсур’ёз. Нам давяраюць”.
Паводле слоў чыноўніка, Вільнюс спадзяецца, што, “магчыма, пакет, які рыхтуецца, учыніць уплыў яшчэ да таго, як будзе прынятае канчатковае рашэнне пра санкцыі”.
Не выключана, лічыць Будрыс, што рэжым Аляксандра Лукашэнкі “зробіць высновы”, перш чым будуць зробленыя “ўсе гэтыя захады”.
Якіх сфер тычацца прапановы па новых абмежавальных мерах, не ўдакладняецца.
Напрыканцы кастрычніка кіраўнік літоўскай дыпламатыі заявіў, што спадзяецца на прагрэс Еўрапейскай камісіі ў пытанні санкцый супраць Беларусі да канца лістапада.
Урад Літвы 29 кастрычніка прыняў рашэнне, што ў сувязі з залётам аэрастатаў з беларускай тэрыторыі ўсе пункты пропуску на беларуска-літоўскай мяжы будуць закрытыя да 24:00 30 лістапада (1:00 1 снежня паводле мінскага часу) з магчымасцю падаўжэння. Па факце яны застаюцца такімі з позняга вечара 26 кастрычніка.
У адказ Мінск забараніў зарэгістраваным у Літве перавозчыкам перасякаць мяжу праз усе пункты пропуску на беларуска-літоўскай мяжы, акрамя тых, якія закрыў Вільнюс.
Да гэтага Літва закрывала мяжу некалькі разоў. Прычынай сталі паветраныя шары з кантрабанднымі цыгарэтамі, якія ў тым ліку пагражалі працы аэрапорта ў Вільнюсе. Упершыню мяжа была закрытая ў ноч на 22 кастрычніка.
Лукашэнка 31 кастрычніка заявіў, што літоўцы “самі з тэрыторыі Беларусі перакідвалі цыгарэты на метэаралагічных зондах”, каб зарабіць на перапродажы.
