Дэпутаты ПП НС прынялі законапраект, які пашырае практыку дактыласкапавання замежнікаў
5 лістапада, Позірк. Законапраект, які пашырае кола асоб, якія падлягаюць абавязковаму дактыласкапаванню, прыняты 5 лістапада ў другім чытанні Палатай прадстаўнікоў Нацыянальнага сходу (ПП НС), паведамляе яе прэс-служба.
Праектам закона сярод іншага прадугледжваецца “надзяленне органаў памежнай службы паўнамоцтвамі на правядзенне абавязковай дактыласкапічнай рэгістрацыі, на атрыманне, выкарыстанне і захоўванне дактыласкапічнай інфармацыі”.
Паводле слоў дэпутата Міхаіла Аксянюка, у гэтай частцы гаворка ідзе аб дактыласкапаванні замежных грамадзян, якія перасякаюць мяжу з Беларуссю. Пералік замежнікаў, якія падлягаюць гэтай працэдуры, “значна павялічаны”, сказаў прадстаўнік ПП НС.
Таксама дакумент прадугледжвае магчымасць прадастаўлення дактыласкапічнай інфармацыі, атрыманай органамі пагранічнай службы, у Дзяржаўны камітэт судовых экспертыз у аўтаматызаваным рэжыме.
Устанаўліваецца абавязак для юрыдычных асоб і індывідуальных прадпрымальнікаў, якія выконваюць міжнародныя аўтамабільныя перавозкі пасажыраў, бязвыплатна перадаваць персанальныя даныя пасажыраў у інфармацыйныя сістэмы Міністэрства транспарту і камунікацый.
Законапраект унесены ў Палату прадстаўнікоў 10 верасня, 30 ліпеня дакумент абмяркоўваўся на пасяджэнні экспертнага савета пад кіраўніцтвам старшыні Савета Рэспублікі НС Наталлі Качанавай.
Зараз абавязковаму дактыласкапаванню ў Беларусі падлягаюць вайскоўцы, супрацоўнікі праваахоўных органаў, асуджаныя, затрыманыя і арыштаваныя асобы, дэпартаваныя або людзі, якія падлягаюць выправаджэнню, без вестак зніклыя (па ініцыятыве сваякоў), асобы, якія праходзяць ваенную або альтэрнатыўную службу, некаторыя катэгорыі дзяржслужачых з доступам да дзяржаўнай таямніцы.
Пры гэтым пасля тэракту ў мінскім метро 11 красавіка 2011 года адбіткі пальцаў бралі фактычна ва ўсіх мужчын краіны, нягледзячы на тое, што нормы заканадаўства гэтага не прадугледжвалі.
