Хрэнін назваў салдат тэрміновай службы “прызыўным рэсурсам”, паводле яго слоў, у арміі з гэтым “няма праблем”
5 лістапада, Позірк. Змены ў “абліччы беларускай арміі” ацаніў кіраўнік Мінабароны Віктар Хрэнін, падводзячы вынікі навучальнага года, паведамляе прэс-служба ведамства.
“У гэтым годзе мы прынялі на ўзбраенне больш за 200 розных узораў узбраення, ваеннай і спецыяльнай тэхнікі. Ва Узброеныя сілы за гэты год пастаўлена больш за 35 тыс. розных узораў тэхнікі і ваенна-тэхнічнай маёмасці”, — сказаў міністр.
Паводле яго слоў, “удалося значна павысіць узровень укамплектаванасці Узброеных сіл”. “Можна смела сказаць, што ў нас няма праблем з прызыўным рэсурсам”, — дадаў Хрэнін.
“Мы дасягнулі поспехаў у павышэнні ўзроўню укамплектаванасці афіцэрскімі кадрамі. Тым самым вырашаем некалькі задач: павышаем ўзровень падрыхтоўкі афіцэраў запасу, якія прыпісаны ў воінскія часткі, і яшчэ адна задача, якую ставіў наш прэзідэнт, галоўнакамандуючы Узброенымі сіламі, — ва Узброеных сілах служыць павінны ўсе. Усе маладыя людзі абавязкова пройдуць (хто прыдатны ў адпаведнасці з заканадаўствам) службу і атрымаюць адпаведную ваенна-ўліковую спецыяльнасць”, — заявіў чыноўнік.
Мінабароны, паводле яго сцвярджэння, удалося дасягнуць высокіх паказчыкаў у “падрыхтоўцы ваенна-навучанага рэсурсу праз прызыў больш за 16 тыс. ваеннаабавязаных, якія прайшлі падрыхтоўку ў гэтым годзе”.
“Узровень падрыхтоўкі Узброеных сіл за мінулы навучальны год значна вырас, мы дасягнулі мэтаў, якія ставілі перад сабой. Але няма мяжы дасканаласці, і мы будзем пастаянна развіваць, удасканальваць у рамках развіцця нашых Узброеных сіл”, — справаздачыўся Хрэнін.
Ён таксама традыцыйна паўтарыў тэзісы пра складаную “абстаноўку вакол Рэспублікі Беларусь”, “дзеянні кіраўніцтва калектыўнага Захаду”, і “агрэсіўную рыторыку” з боку заходніх краін.
Раней паведамлялася, што ў рамках восеньскага прызыву ў беларускае войска будзе накіравана каля 10 тыс. салдат тэрміновай службы.
Указ аб восеньскім прызыве ў шэрагі Узброеных сіл падпісаў 12 жніўня Аляксандр Лукашэнка.
Згодна з дакументам, прызыву падлягаюць грамадзяне Беларусі мужчынскага полу, якім да дня прызыву споўнілася 18 гадоў і якія не маюць права на адтэрміноўку, а таксама грамадзяне прызыўнога ўзросту, якія страцілі права на адтэрміноўку.
У 2024 годзе аналагічны ўказ аб восеньскім прызыве Лукашэнка падпісаў 7 жніўня, у 2023-м — 27 ліпеня, у 2022-м — 4 ліпеня, у 2021-м — 20 ліпеня, у 2020-м — 3 жніўня, у 2019-м — 22 ліпеня.
У Беларусі штогод адбываюцца два прызывы — восеньскі і вясновы, для кожнага падпісваюцца асобныя ўказы.
На пачатку 2023 года былі зніжаныя патрабаванні да стану здароўя грамадзян, якія прымяняюцца пры вызначэнні прыдатнасці да праходжання вайсковай службы. У прыватнасці, верхняя мяжа масы, пры якой грамадзян прызнаюць непрыдатнымі да службы ў сілах спецыяльных аперацый, узнятая з 90 да 100 кг. Пры гэтым мужчын, якія важаць больш за 100 кг, дазволена прымаць у органы пагранічнай службы, а таксама спецыяльныя міліцэйскія злучэнні і воінскія часці.
Раней не прыпісваліся да прызыўных участкаў і прызнаваліся непрыдатнымі да тэрміновай службы і службы ў рэзерве ў мірны час грамадзяне з атлусценнем II ступені з індэксам масы цела 37 кг/м2 (больш за 117 кг пры сярэднім для беларускіх мужчын росце 178 см), з блізарукасцю любога вока на адным з мерыдыянаў 6-8 дыёптрый. Цяпер такія грамадзяне прызнаюцца абмежавана прыдатнымі да тэрміновай службы і службе ў рэзерве. Як і раней, яны застаюцца прыдатнымі з абмежаваннямі да службы па кантракце ў спецыяльных злучэннях.
За ўхіленне ад службы прадугледжана адказнасць па арт. 435 Крымінальнага кодэкса (ухіленне ад мерапрыемстваў па прызыву на вайсковую службу).
Паводле звестак Вярхоўнага суда, колькасць грамадзян, якіх прыцягваюць па гэтым артыкуле, змяншаецца. У 2016 годзе па арт. 435 КК было асуджана 676 асоб, у 2023-м — 266.
