Накіраваная ў суд справа ўдзельніка травеньскай аварыі ў Воранаўскім раёне, пасля якой загінула двое дзяцей
4 лістапада, Позірк. Накіраваная ў суд справа ўдзельніка смяротнай аварыі, якая здарылася 29 траўня ў Воранаўскім раёне (Гродзенская вобласць), паведаміла 4 лістапада прэс-служба Генеральнай пракуратуры.
Кіроўцу грузавога аўтамабіля прыватнага прадпрыемства інкрымінаваныя ч. 5 арт. 317 (парушэнне правілаў дарожнага руху асобай, якая кіруе транспартным сродкам у стане алкагольнага ап’янення, што пацягнула з неасцярожнасці смерць дзвюх і больш асоб, а таксама нанясенне менш цяжкага цялеснага пашкоджання) і ч. 3 арт. 159 (яўнае пакіданне ў небяспецы, здзейсненае асобай, якая сама з неасцярожнасці паставіла пацярпелага ў небяспечны для жыцця або здароўя стан) Крымінальнага кодэксу.
Згодна з матэрыяламі справы, 55-гадовы жыхар Бабруйска (Магілёўская вобласць) уначы 29 траўня 2025 года, “свядома парушыўшы правілы бяспекі, кіраваў аўтацягніком у стане ап’янення”, рухаючыся пры гэтым з хуткасцю каля 89 кіламетраў на гадзіну — пры максімальна дапушчальных 70 км/г.
На закругленні дарогі направа мужчына выехаў на сустрэчную паласу і сутыкнуўся з аўтамабілем “Аўдзі” пад кіраваннем 34-гадовага жыхара Воранаўскага раёна, які вяртаўся дадому з жонкай і трыма малалетнімі дзецьмі (узрост — ад 1 года да 5 гадоў).
У выніку аварыі загінула двое дзяцей (2019 і 2024 гадоў нараджэння), аднаму дзіцяці (2020 г.н.) нанесеныя цяжкія цялесныя пашкоджанні. Пры гэтым кіроўца “Аўдзі” і яго 27-гадовая жонка атрымалі менш цяжкія і лёгкія цялесныя пашкоджанні, якія прывялі да кароткачасовага разладу здароўя.
“Пасля аварыі абвінавачаны не аказаў пацярпелым неабходную і відавочна неадкладную дапамогу, хоць меў такую магчымасць і быў абавязаны гэта зрабіць, — заявіла пракуратура. — Не паведаміў пра ДТЗ ва ўстанову аховы здароўя або органы ўнутраных спраў, а ўцёк з месца здарэння, пакінуўшы пацярпелых у небяспецы. Праз чатыры гадзіны супрацоўнікі пагранічных органаў з прымяненнем службовага сабакі знайшлі кіроўцу аўтацягніка, які хаваўся ў яры, за тры кіламетры ад месца здарэння. Праведзеным пасля затрымання медыцынскім аглядам пацверджаная канцэнтрацыя этылавага спірту ў яго крыві на ўзроўні больш за 1 праміле”.
Паводле даных следства, за стырном кіроўца піў каньяк — бутэлькі з-пад гэтага спіртнога знойдзеныя ў кабіне грузавіка.
З паведамлення вынікае, што раней мужчына прыцягваўся да крымінальнай адказнасці за ДТЗ, якое прывяло да прычынення цяжкіх цялесных пашкоджанняў, пакаранне за гэта злачынства адбыў. Неаднаразова прыцягваўся да адміністрацыйнай адказнасці, у тым ліку за перавышэнне хуткаснага рэжыму, здзяйсненне ДТЗ і пакіданне месца здарэння.
Цяпер абвінавачаны знаходзіцца пад вартай.
13 кастрычніка стала вядома, што мужчыну перакваліфікавалі абвінавачанне. Першапачаткова ў дачыненні да кіроўцы цягача распачалі крымінальную справу паводле ч. 4 арт. 317 КК (парушэнне правілаў дарожнага руху асобай, якая кіруе транспартным сродкам у стане алкагольнага ап’янення, якое пацягнула з неасцярожнасці смерць чалавека або прычыненне цяжкага цялеснага пашкоджання). Абвінавачанне было перакваліфікаванае ў сувязі з новымі абставінамі — смерцю другога дзіцяці.
