Беларусь мае намер падтрымліваць высокія стандарты ў галіне правоў чалавека — намеснік кіраўніка МЗС

3 лістапада, Позірк. Беларусь “мае намер падтрымліваць высокія стандарты ў галіне правоў чалавека, скіраваныя на сацыяльную абароненасць, эканамічную стабільнасць і палітычную еднасць беларускіх грамадзян”, заявіў 3 лістапада ў Жэневе намеснік міністра замежных спраў Беларусі Ігар Сакрэта.

Беларускі чыноўнік прадставіў нацыянальны даклад у рамках чацвёртага цыкла ўніверсальнага перыядычнага агляду (УПА), які праходзіць у рамках Савета ААН па правах чалавека.

Спыніўшыся на “высокім узроўні прагрэсу Беларусі” ў дасягненні Мэтаў устойлівага развіцця, Сакрэта выказаў меркаванне, што “гэтыя паказчыкі маглі б быць яшчэ больш высокімі, калі б не аднабаковыя прымусовыя меры, што валюнтарысцкім чынам уведзеныя шэрагам заходніх краін у дачыненні да Беларусі”.

На яго думку, “палітыка санкцыйнага ціску, якую прасоўваюць гэтыя краіны, парушае эканамічныя і сацыяльныя правы не толькі беларускіх грамадзян, але і грамадзян многіх іншых краін”.

У гэтым кантэксце намеснік міністра заявіў, што “забарона на выкарыстанне паветранай прасторы Беларусі робіць небяспечнай грамадзянскую авіяцыю і сумнеўнай “зялёную здзелку” Еўрапейскага саюза”, і адзначыў, што “Захадам закрытая большасць, а недзе і ўсё, напрыклад Літвой, наземных пагранпераходаў”.

“У выніку злоўжывання заходнімі суседзямі Беларусі сваім геаграфічным становішчам — у наяўнасці гуманітарныя і эканамічныя страты”, — падкрэсліў Сакрэта.

Адначасова ён выказаў меркаванне, што ў Беларусі “атрымалася пераарыентаваць сваю эканоміку і выбудаваць сістэму”, якая забяспечвае грамадзянам краіны “годны ўзровень якасці жыцця”.

“У той жа час мы заклікаем ЕС вярнуцца ў рэчышча дыялогу і зняць усе незаконныя абмежаванні, бо такім дзеянням не месца ў сучасным цывілізаваным свеце”, — заявіў Сакрэта.

Цяпер у Жэневе праходзяць спрэчкі па дакладзе Беларусі. Для ўдзелу ў іх зарэгістраваліся прадстаўнікі 106 краін. Магчымасць адказаць дадзеная беларускай дэлегацыі, у складзе якой упаўнаважаны па справах рэлігій і нацыянальнасцей, прадстаўнікі Генпракуратуры, Нацыянальнага статыстычнага камітэта, а таксама міністэрстваў — замежных спраў, інфармацыі, працы і сацабароны, юстыцыі.

У адпаведнасці з правіламі кожная дэлегацыя выказвае рэкамендацыі на адрас Беларусі ў галіне датрымання правоў чалавека. Шэраг дружалюбных да афіцыйнага Мінска дэлегацый адзначае, што дае такія рэкамендацыі “ў канструктыўным духу”.

УПА — агляд сітуацыі з правамі чалавека ва ўсіх дзяржавах — членах ААН. Ад моманту правядзення першага пасяджэння ў красавіку 2008 года ўсе 193 краіны прайшлі агляд па тры разы. Чакаецца, што падчас чацвёртага цыкла УПА дзяржавы зноў апішуць захады, зробленыя імі з мэтай укаранення рэкамендацый, атрыманых у ходзе папярэдніх цыклаў агляду, якіх яны абавязаліся прытрымлівацца, а таксама асветляць апошнія падзеі ў галіне правоў чалавека ў краіне.

Рабочая група па УПА плануе прыняць рэкамендацыі, вынесеныя Беларусі, 14 лістапада 2025 года.