Лукашэнка жадае “актывізаваць сувязі” з Панамай

3 лістапада, Позірк. Зацікаўленасць Мінска ў “актывізацыі сувязей” з Панамай і “эфектыўным выкарыстанні магчымасцей” для ўмацавання гандлёва-эканамічнай супрацы выказаў Аляксандр Лукашэнка, віншуючы 3 лістапада прэзідэнта гэтай краіны ў Цэнтральнай Амерыцы Хасэ Рауля Муліна з Днём незалежнасці.

“У Беларусі з вялікай павагай ставяцца да гісторыі і дасягненняў панамскага народа, які з уласцівымі яму стойкасцю і мудрасцю здолеў пабудаваць сучасную дзяржаву з дынамічнай эканомікай”, — прыводзіць тэкст паслання прэс-служба віншавальніка.

Дыпламатычныя стасункі паміж краінамі ўсталяваныя 22 кастрычніка 1998 года.

З 13 кастрычніка 2025 года інтарэсы Мінска ў Калумбіі, Панаме і Эквадоры па сумяшчальніцтве прадстаўляе амбасадар Беларусі ў Венесуэле Дзмітрый Дзеравінскі. Да таго за Панаму адказваў амбасадар у Калумбіі (дыпламатычнае прадстаўніцтва ў Багаце да 30 траўня 2023 года ўзначальваў Мікалай Аўсянка, пасля яго вызвалення ад пасады Мінск там прадстаўлены на ўзроўні часовага паверанага ў справах).

Амбасадар Панамы ў Расіі і па сумяшчальніцтве ў Беларусі ўручыў даверчыя граматы Лукашэнку ў чэрвені 2023 года.

Даных па гандлёва-эканамічнай супрацы з Панамай МЗС Беларусі не прыводзіць.