Лукашэнка: Літоўцы самі з тэрыторыі Беларусі перакідвалі цыгарэты на метэазондах

31 кастрычніка, Позірк. Літоўцы “самі з тэрыторыі Беларусі перакідвалі цыгарэты на метэаралагічных зондах”, каб зарабіць на перапродажы, заявіў Аляксандр Лукашэнка 31 кастрычніка падчас наведвання Бярэзінскага біясфернага запаведніка (Лепельскі раён Віцебскай вобласці).

“У такія ўмовы іх паставілі ўласныя ўлады, перарваўшы нармальныя гандлёвыя сувязі і пабудаваўшы плот на мяжы”, — сцвярджае аратар, якога цытуюць дзяржСМІ.

“Улады, літоўскія і польскія, — вы вінаватыя, што так адбываецца. Навошта вы паставілі людзей у такія ўмовы? Навошта вы іх штурхнулі на шлях злачынства?”, — сказаў Лукашэнка.

Паводле яго слоў, беларускія грамадзяне “абсалютна легальна набывалі на вытворчасці цыгарэты і перадавалі літоўцам, што прыбылі на тэрыторыю Беларусі, атрымліваючы свой навар”. Тады як самі літоўцы “сваім саўдзельнікам перапраўлялі тавар з дапамогай паветраных шароў”.

“Наладзілі гэты бізнес. Нашы на фабрыцы бяруць цыгарэты па выгаднай цане, прадаюць літоўцам. Трэба перакінуць праз агароджу. Маленькімі порцыямі перакідвалі на гэтых шарыках. Там літоўцы прымалі шары і бралі гэтыя цыгарэты. Не ў Літве прадавалі. У Нідэрландах і Англіі. Кажуць, там самыя дарагія цыгарэты”, — адзначыў Лукашэнка.

“Як я магу з іх спытаць, у чым тут віна Беларусі? Я не бачу, за што караць людзей. Яны хацелі зарабіць — яны зарабілі. Калі б яны скралі гэтыя цыгарэты… Не, яны заплацілі”, — дадаў ён.

Доказаў датычнасці грамадзян Літвы да перакідвання цыгарэт ён не прадставіў.

У Вільнюсе пасля чарговага закрыцця аэрапорта праз фіксацыю ў паветранай прасторы Літвы зондаў з кантрабанднымі цыгарэтамі на палову сутак былі затрыманыя асобныя авіярэйсы.

Аэрапорт не працаваў менш за тры гадзіны, яго кіраўніцтва папярэдзіла, што “цягам дня магчымыя затрымкі асобных рэйсаў праз парушэнне ратацыі экіпажаў і паветраных суднаў”.

Усе пункты пропуску на беларуска-літоўскай мяжы будуць закрытыя цягам месяца — такое рашэнне прынята на пасяджэнні ўрада балтыйскай краіны 29 кастрычніка. Магчыма працягненне абмежаванняў пасля 30 лістапада.

Познім вечарам 26 кастрычніка Літва закрыла мяжу з Беларуссю на нявызначаны тэрмін, такім чынам, цяпер тэрмін працягнуты да канца восені.

Да гэтага Літва зачыняла мяжу некалькі разоў. Прычынай сталі паветраныя шары з кантрабанднымі цыгарэтамі, якія, у тым ліку, пагражалі працы аэрапорта ў Вільнюсе. Упершыню мяжа была закрытая ў ноч на 22 кастрычніка.