Лукашэнка: Афрыка для Беларусі — той жа Кітай 30 гадоў таму, рынак будучыні
30 кастрычніка, Позірк. Афрыка для Беларусі — “той жа Кітай 30 гадоў таму, рынак будучыні”, куды “трэба актыўна ісці і заваёўваць на ім свае нішы”, заявіў Аляксандр Лукашэнка 30 кастрычніка на нарадзе па пытаннях развіцця супрацоўніцтва з афрыканскімі краінамі.
“Менавіта там рэзерв дыверсіфікацыі экспарту для базавых галін нашай эканомікі, такіх як сельская гаспадарка, машынабудаванне, вытворчасць мінеральных угнаенняў і іншыя”, — цытуе Лукашэнку яго прэс-служба.
Паводле яго слоў, ён не бачыць “прыкмет сістэмнай працы” з краінамі Афрыкі, “ніхто нічога не карэктуе ні ў планах, ні ў метадах”.
Лукашэнка прывёў даныя аб эканоміцы Афрыкі: тэмпы росту ВУП гэтага кантынента перавышаюць сярэднесусветныя — больш за 4% супраць 3% у 2025 годзе, дэмаграфічны рост складае 2–3% у год. Пры гэтым, адзначыў ён, доля ў міжнародным гандлі пакуль “неадэкватна нізкая”: 2,6% сусветнага экспарту і 3% — імпарту. Гэта кажа, што там “сціскаецца спружына адкладзенага попыту”, мяркуе прамоўца.
Ён падкрэсліў: “Тут знаходзіцца траціна сусветных запасаў карысных выкапняў, у тым ліку 8% усяго прыроднага газу, 12% нафты, 40% золата, да 90% хрому і плаціны. Гэта сёння ператварае Афрыку ў лакаматыў, у счэпцы з якім можна рухацца наперад. Але менавіта ў моцнай счэпцы, а не спрабуючы заскочыць на апошнюю прыступку адыходзячага цягніка”.
На думку Лукашэнкі, у праграме дзеянняў па развіцці супрацоўніцтва з краінамі Афрыкі на 2024–2026 гады лічбы заніжаныя: “Напрыклад, тэмп росту экспарту тавараў — 107,2% пры сярэднім па краіне 97,5%”.
У паведамленні прэс-службы Лукашэнкі гаворыцца, што ў бягучым годзе “вычышчаны“ экспарт у краіны Афрыкі (без нафтапрадуктаў, угнаенняў і спецпрадукцыі) складае менш за чвэрць ад аб’ёму паставак — 130 млн долараў. На ўсе афрыканскія краіны прыпадае толькі 2% ад агульнага аб’ёму экспарту Беларусі (за 8 месяцаў мінулага года гэты паказчык быў на ўзроўні 1,9%).
Адзначыўшы, што сітуацыя на асноўных экспартных рынках цяпер складаная, Лукашэнка сказаў, што “трэба ісці на далёкую дугу і там працаваць“.
Як паведамлялася, 2 кастрычніка Лукашэнка правёў тры закрытыя сустрэчы, адна з іх тычылася супрацоўніцтва з афрыканскімі краінамі.
“Пастаўкі беларускай прадукцыі на афрыканскі кантынент, зборачная вытворчасць тэхнікі, супрацоўніцтва ў сферы сельскай гаспадаркі і забеспячэнне харчовай бяспекі — усё гэта запатрабаваныя напрамкі, па якіх ёсць запыт у афрыканскіх партнёраў”, — гаварылася ў рэлізе. Сцвярджалася, што Лукашэнка “патрабуе інтэнсіфікаваць працу і паскарацца”.
Улады разлічваюць павялічыць экспарт у Афрыку да 1 млрд долараў да 2030 года, вынікае са слоў першага намесніка міністра замежных спраў Сяргея Лукашэвіча 30 верасня на семінары аб “актуальных пытаннях беларуска-афрыканскага супрацоўніцтва” ў Палаце прадстаўнікоў.
У 2024 годзе беларускі экспарт на кантынент вырас дасягнуў 650 млн долараў, за студзень — ліпень гэтага года пастаўкі перавысілі 500 млн долараў, паведамляў раней са спасылкай на прадстаўніка МЗС сайт “Эканамічнай газеты”.
Лукашэнка актыўна прасоўвае ідэю пашырэння супрацоўніцтва Беларусі з краінамі Афрыкі, бачачы ў гэтым спосаб абысці заходнія санкцыі і знайсці новыя рынкі збыту для беларускіх тавараў. Ён праводзіць перамовы з лідарамі афрыканскіх дзяржаў, абяцаючы пастаўкі тэхнікі, угнаенняў і харчавання ў абмен на сыравіну і палітычную падтрымку.
Пры гэтым рызыкі партнёрства замоўчваюцца, напрыклад, тое, што многія афрыканскія краіны маюць слабыя эканомікі, высокі ўзровень карупцыі, палітычную нестабільнасць і нізкую плацежаздольнасць.
