ГУБАЗіК затрымаў 19 членаў АЗГ, якая займалася махлярствам, у тым ліку дагаворнымі спаборніцтвамі

29 кастрычніка, Позірк. Аб затрыманні ў Мінску і Мінскай вобласці 19 “кіраўнікоў і ўдзельнікаў арганізаванай групы“ паведаміў у відэакаментарыі начальнік аддзела 5-га ўпраўлення (па сталіцы) ГУБАЗіК МУС Сяргей Ванагель.

Паводле яго слоў, група з 2021 года падманным шляхам выкрадала грошы грамадзян, якія рабілі стаўкі на сайце букмекерскай канторы 1XBET. Фігуранты арганізавалі і транслявалі на сайце канторы “дагаворныя турніры па баскетболе і тэнісе“.

“Пры ператрусах на спартыўных аб’ектах, офісах у сталіцы і Мінскай вобласці канфіскаваныя аргтэхніка, дакументацыя, грашовыя сродкі і крыптаактывы на суму каля паўмільёна даляраў у эквіваленце“, — заявіў прадстаўнік ГУБАЗіК.

Ванагель сцвярджае, што ўстаноўлена каля 200 удзельнікаў незаконных спартыўных спаборніцтваў. “На чале групы стаяць асобы, якія цягам некалькіх гадоў адшукваюцца праваахоўнымі органамі Расійскай Федэрацыі за арганізацыю дзейнасці злачыннай супольнасці. У нашай краіне букмекерская кантора 1XBET па-за законам, бо не мае адпаведнай ліцэнзіі“, — адзначыў спікер.

Адкрыта крымінальная вытворчасць па арт. 209 КК (махлярства).