Галоўчанка чакае інфляцыю па выніках года на ўзроўні 6%
29 кастрычніка, Позірк. “Так званая трэндавая інфляцыя”, якая “разлічваецца на аснове спецыяльных методык, вычышчаных ад уплыву нейкіх кан’юнктурных фактараў, цяпер знаходзіцца на ўзроўні 6%”, заявіў кіраўнік Нацыянальнага банка Раман Галоўчанка 29 кастрычніка пасля дакладу Аляксандру Лукашэнку.
“Я мяркую, што прыкладна на гэты ўзровень, які склаўся цяпер, мы павінны і выйсці на канец 2025 года”, — адзначыў чыноўнік (па відэа ў тэлеграм-канале рэгулятара).
Паводле яго слоў, тэндэнцыя інфляцыйных працэсаў “ідзе да запаволення”: “Калі памятаеце, у ліпені гэтая лічба ўраўнавалася 7,4%. Вядома, гэта крыху вышэй за нашу мэту ў 5%, але тут сваю ролю адыгралі, так скажам, разавыя фактары”.
Да іх ён аднёс “рост цэн у вытворцаў і аператыўны перанос інфляцыі з <…> Расійскай Федэрацыі”.
“Асноўным драйверам” росту цэн, сказаў Галоўчанка, з’яўляецца “харчовая група”, асабліва сезонная гародніна, садавіна, пры тым, што “цэны на нехарчовыя тавары растуць тэмпамі, якія істотна ніжэй за 5-працэнтнага парогу”.
Кіраўнік Нацбанка сцвярджае, што ўлады “нейкай вялікай рызыкі ўзмацнення інфляцыйных працэсаў не бачаць”.
Раней паведамлялася, што спажывецкія цэны ў верасні 2025 года выраслі на 0,5%. Харчовыя тавары падаражэлі на 0,5%, нехарчовыя — на 0,2%, паслугі — на 0,6%.
У параўнанні са снежнем 2024 года цэны выраслі на 5,8%: харчовыя тавары сталі даражэйшымі на 6,9%, нехарчовыя — на 2,9%, паслугі — на 7,6%.
У гадавым вымярэнні (да верасня 2024 года) цэны павялічыліся на 7,1%. Харчаванне стала даражэйшым на 9,8%, нехарчовыя тавары — на 2,9%, паслугі — на 7,9%.
Міністэрства антыманапольнага рэгулявання і гандлю пастановай № 4 ад 27 студзеня вызначыла паказчыкі штомесячнага (з нарастаннем) дапушчальнага павелічэння цэн у студзені цэны не павінны былі вырасці больш чым на 0,7% (фактычна — +0,7%), па выніках студзеня — лютага — на 1,9% (+2%), студзеня — сакавіка — на 2,2% (+2,8%), студзеня — красавіка — на 2,7% (+3,8%), студзеня — траўня — на 3% (+4,5%), студзеня — чэрвеня — 3,3% (+5,4%), студзеня — ліпеня — 3,4% (+5,6%), студзеня — жніўня — 3,4% (+5,3%), студзеня — верасня — 3,7% (+5,8%).
Далей: студзеня — кастрычніка — 4,1%, студзеня — лістапада — 4,4%, студзеня — снежня — 5% (гэтая адзнака з’яўляецца зацверджанай Лукашэнкам на 2025 год).
Тэндэнцыю росту інфляцыі “неабходна пераламаць”, заявіў Лукашэнка 9 верасня ў Мінску на нарадзе з апаратам Нацбанка і кіраўніцтвам банкаў.
На думку спікера, роля рэгулятара ў гэтым працэсе “наогул пакуль слаба прасочваецца”.
“Нізкая інфляцыя патрэбная нашым прадпрыемствам для планавання доўгатэрміновых інвестыцый, — падкрэсліў Лукашэнка. — А людзям — для таго, каб не падала іх пакупніцкая здольнасць і не абясцэньваліся даходы і зберажэнні”.
Гаворачы аб асноўных задачах для банкаўска-фінансавай сістэмы, ён заявіў, што важна “забяспечыць фінансавую стабільнасць”.
Эканоміка Беларусі пры адсутнасці моцных знешніх шокаў “працягне функцыянаваць у стане перагрэтага залішняга ўнутранага попыту”, вынікала з агляду манетарнага асяроддзя за другі квартал 2025 года, прадстаўленага даследчым цэнтрам BEROC.
Старшы навуковы супрацоўнік BEROC Анатоль Харытончык на брыфінгу 25 чэрвеня адзначыў, што інфляцыя ў Беларусі “пачынае тэставаць гранічныя ўзроўні, якія ўлады краіны гатовыя дапусціць для кароткатэрміновага стымулявання росту ВУП з дапамогай залішне мяккай эканамічнай палітыкі — 7–9% у гадавым вылічэнні паводле вынікаў 2025 года”.
Паводле прагнозу Еўразійскага банка развіцця інфляцыя па выніках года складзе 7,7%.
