Кіраўнік НЦКК Віткаўскас: 26 кастрычніка ў Літву заляцела 66 аэрастатаў з Беларусі — удвая больш, чым днём раней

27 кастрычніка, Позірк. Увечары 26 кастрычніка ў Літву з Беларусі было запушчана больш аэрастатаў з кантрабанднымі цыгарэтамі, чым днём раней, паведаміў кіраўнік Нацыянальнага цэнтра кіравання крызісамі (НЦКК) балтыйскай краіны Вілмантас Віткаўскас.

Паводле яго слоў, якія прыводзіць партал lrt.lt, зафіксавана 66 аб’ектаў, якія заляцелі ў літоўскую паветраную прастору, гэта “прыкладна ў два разы больш”, чым 25 кастрычніка.

Віткаўскас адзначыў, што знойдзены пакуль толькі адзін паветраны шар, пошукі астатніх працягваюцца.

Мінулай ноччу з-за залёту аэрастатаў у чацвёрты раз прыпыняў працу аэрапорт у Вільнюсе. Таксама Літва закрыла абодва наземныя пункты пропуску на мяжы з Беларуссю, Мядзінінкай (з беларускага боку Каменны Лог) і Шальчынінкай (Беняконі). Апошні раз да гэтага яны зачыняліся з 22:45 25 кастрычніка да 2:00 26 кастрычніка. Час адкрыцця не называецца.

Раней прэзідэнт Літвы Гітанас Наўседа прапанаваў абмежаваць транзіт з Беларусі ў Калінінградскую вобласць (РФ) праз залёт у краіну аэрастатаў.

Прэм’ер-міністр Літвы Інга Ругінене анансавала пасяджэнне Камісіі па нацыянальнай бяспецы, па выніках якога 27 кастрычніка будуць прапанаваныя “канкрэтныя рашэнні” па сітуацыі з аэрастатамі. Яна ж, паводле інфармацыі літоўскіх СМІ, 26 кастрычніка заявіла, што не выключае прыняцця на пасяджэнні пастановы аб закрыцці мяжы з Беларуссю на працяглы час.