У Брэсцкай вобласці пад коламі цягніка загінуў мужчына

24 кастрычніка, Позірк. Пра гібель 62-гадовага мясцовага жыхара ў Маларыце (Брэсцкая вобласць) паведаміў Следчы камітэт.

Грамадзянін быў смяротна траўмаваны ў выніку наезду цягніка раніцай 24 кастрычніка паблізу чыгуначнай станцыі. На месцы здарэння працавала следча-аператыўная група.

“Папярэдне ўстаноўлена, што мужчына напярэдадні гібелі ўжываў спіртное і рана раніцай вяртаўся дадому праз чыгуначныя шляхі”, — адзначыў СК.

Абставіны здарэння будзе высвятляць Маларыцкі раённы аддзел Следчага камітэта, “асаблівая ўвага будзе нададзена прычынам і ўмовам, што спрыялі трагедыі”.

У красавіку намеснік начальніка ўпраўлення грамадскай бяспекі на аб’ектах транспарту МУС Віталь Якубоўскі паведаміў, што ад пачатку 2025 года на чыгунцы зафіксавана 18 няшчасных выпадкаў, 11 з іх — са смяротным вынікам.

За дзевяць месяцаў года на аб’ектах чыгуначнага транспарту здарылася 8 няшчасных выпадкаў з удзелам непаўналетніх, 5 з іх — са смяротным вынікам, паведаміла 13 кастрычніка Беларуская чыгунка.