Распачатая спецвытворчасць у дачыненні да 40-гадовага Дзмітрыя Баніта
24 кастрычніка, Позірк. Спецыяльная вытворчасць у дачыненні да 40-гадовага Дзмітрыя Баніта распачатая 23 кастрычніка, паведамляецца ў спецыялізаваным тэлеграм-канале Следчага камітэта.
Мужчыну інкрымінаваныя ч. 1 арт. 130 (распальванне расавай, нацыянальнай, рэлігійнай або іншай сацыяльнай варожасці або варажнечы), арт. 188 (паклёп), ч. 3 арт. 2031 (незаконныя дзеянні ў дачыненні да інфармацыі пра прыватнае жыццё і персанальныя звесткі), арт. 364 (гвалт або пагроза прымянення гвалту ў дачыненні да супрацоўніка міліцыі або яго блізкіх з мэтай перашкоды яго законнай дзейнасці або з помсты), арт. 369 (абраза прадстаўніка ўлады) Крымінальнага кодэкса.
Баніту прапанавана прыбыць у Баранавіцкі міжраённы аддзел СК.
У студзені 2020 года праваабарончы цэнтр “Вясна”, паведамляючы пра рэпрэсіі ў Баранавічах, згадваў пра тое, што Баніта “выклікаюць у ГУУС у сувязі з узбуджэннем у дачыненні да яго крымінальнай справы за абразу ў адным з раённых чатаў”.
Цяпер мужчына, калі меркаваць з яго старонкі ў “Фэйсбуку”, жыве ў Польшчы.
Працэдура спецыяльнай вытворчасці ў Беларусі прымянялася ў дачыненні да мінімум 161 чалавека (на падставе спісу СК на 24 кастрычніка).
Спецвытворчасць — гэта вытворчасць па крымінальнай справе ў дачыненні да абвінавачанага, які знаходзіцца па-за межамі Беларусі і ўхіляецца ад яўкі ў орган, што вядзе крымінальны працэс.
Магчымая па 34 складах злачынстваў, якія пераважна адносяцца да катэгорыі цяжкіх і асабліва цяжкіх. Сярод іншага гэта акт тэрарызму, генацыд, наёмніцтва, здрада дзяржаве, дыверсія, стварэнне экстрэмісцкага фарміравання або ўдзел у ім, масавыя беспарадкі, заклікі да санкцый ды інш.
Улады актыўна выкарыстоўваюць спецвытворчасць для абвінавачання, правядзення судоў і канфіскацыі на падставе іх рашэння ўласнасці фігурантаў, якія знаходзяцца за мяжой.
У прыватнасці, у ліпені спецвытворчасць была распачатая ў дачыненні да сузаснавальніка і былога топ-менеджара кампаніі Wargaming Мікалая Кацалапава, у жніўні — закранула прадстаўнікоў ініцыятывы “Сумленныя людзі” Алену Жылачкіну (Жываглод), Зарыну Сарокіну, Алега Давыдчыка і Цімафея Малахоўскага, а таксама ўдзельніка падзей 2020 года Віктара Балкоўскага, верасні — экс-добраахвотніка палка Каліноўскага і былога члена Каардынацыйнай рады Максіма Шабуцкага.
