Літва ўручыла Беларусі ноту пратэсту ў сувязі з “неаднаразовымі парушэннямі паветранай прасторы“
22 кастрычніка, Позірк. Ноту пратэсту ў сувязі з “неаднаразовымі і частымі парушэннямі паветранай прасторы Рэспублікай Беларусь” уручыла Міністэрства замежных спраў Літвы 22 кастрычніка часоваму паверанаму ў справах Беларусі.
Як паведамляе прэс-служба МЗС, “незаконнае пранікненне групы метэазондаў <…>, зафіксаванае радыёлакацыйнымі сродкамі, стварыла пагрозу грамадзянскай авіяцыі і грамадскай бяспекі“, а парушэнне працы Вільнюскага аэрапорта “пацягнула за сабой фінансавыя страты“.
Знешнепалітычнае ведамства Літвы назвала парушэнні дзяржаўнай мяжы “грубым парушэннем міжнароднага права”.
Вільнюс заклікаў Мінск забяспечыць кантроль сваёй паветранай прасторы, а таксама запатрабаваў правесці расследаванне таго, што адбылося.
МЗС папярэдзіў, што ў выпадку паўторных незаконных парушэнняў паветранай прасторы Літва пакідае за сабой права прыняць “адпаведныя меры ў адказ“.
У выпадку яшчэ аднаго масавага залёту на тэрыторыю Літвы паветраных шароў з кантрабандай мяжа з Беларуссю будзе закрытая, заявіла 22 кастрычніка прэм’ер-міністр балтыйскай краіны Інга Ругінене.
“Мы не пойдзем ні на якія саступкі Беларусі ў гэтым пытанні, — дадала Ругінене. — <…>Мы дакладна не будзем марнаваць на гэты час. <…> Гэта выразна дае зразумець нашым суседзям, што мы дакладна не пацерпім падобных дзеянняў”.
Аб перспектывах закрыцця мяжы з Беларуссю “на больш працяглы тэрмін” з-за інцыдэнту з аэрастатамі раней 22 кастрычніка заявіў галоўны дарадца прэзідэнта Літвы Дэйвідас Матулёніс.
У ноч на 22 кастрычніка ў Літву з боку Беларусі масава заляцелі паветраныя шары, якія кантрабандысты звычайна выкарыстоўваюць для дастаўкі цыгарэт. Паведамлялася, што агулам у Літве выяўлена восем шароў, затрыманы адзін чалавек.
З-за палёту паветраных шароў прыпыняў працу Вільнюскі аэрапорт. Паводле слоў прадстаўніка аэрапорта Віталя Рочэ, пацярпела больш за 4 тыс. пасажыраў, рэйсы якіх перанеслі або адмянілі.
Таксама праз метэазонды, якія прыляцелі з боку Беларусі, Літва закрывала мяжу.
