Трох беларусаў затрымалі ў Польшчы за кантрабанду цыгарэт
21 кастрычніка, Позірк. Пра выяўленне чарговых партый кантрабандных цыгарэт, дастаўленых у Польшчу з Беларусі з дапамогай паветраных шароў, паведаміла Памежная ахова Падляскага ваяводства.
Агулам канфіскавана тытунёвай прадукцыі на 185 тыс. злотых (каля 51,4 тыс. долараў).
Адзначаецца, што раніцай 21 кастрычніка на тэрыторыі ваяводства выяўлены тры метэазонды з цыгарэтамі без польскіх акцызных марак. Напярэдадні памежнікі знайшлі яшчэ адзін аэрастат з аналагічным грузам. 19 кастрычніка былі выяўлены два грузы.
Паведамляецца пра затрыманне чатырох чалавек — трох грамадзян Беларусі і ўкраінца. Памежная служба ўдакладняе, што яны перавозілі ў аўтамабілі груз з 1,5 тыс. кантрабандных цыгарэт. Затрыманым прад’яўлены крымінальныя абвінавачванні. “Працягваюцца мерапрыемствы па выяўленні астатніх асоб, датычных да адпраўкі і атрымання нелегальных адпраўленняў”, — гаворыцца ў паведамленні.
“Памежная бяспека, створаная на польска-беларускай мяжы, у тым ліку ў выглядзе фізічнага і электроннага бар’ера, прывяла да таго, што кантрабандысты шукаюць новыя спосабы кантрабанды нелегальных тытунёвых вырабаў”, — адзначаецца ў рэлізе.
Паводле даных ведамства, ад пачатку 2025 года ў Падляскім ваяводстве зафіксавана каля 120 выпадкаў кантрабанды цыгарэт па паветры на суму звыш 2,9 млн злотых (каля 8,1 млн долараў). Затрымана 25 чалавек.
Суседнія з Беларуссю краіны ЕС рэгулярна паведамляюць пра перахопы дронаў з кантрабанднымі беларускімі цыгарэтамі.
11 кастрычніка памежная служба Літвы паведаміла, што ад пачатку 2025 года было перахоплена 47 дронаў з Беларусі, якія транспартавалі кантрабандныя цыгарэты.
30 верасня стала вядома аб затрыманні ў Польшчы двух беларусаў, якіх падазраюць у кантрабандзе цыгарэт.
Днём раней паведамлялася, што 12 паветраных шароў, запушчаных кантрабандыстамі з Беларусі, прызямліліся ў памежным Падляскім ваяводстве Польшчы.
9 верасня Памежная ахова паведаміла аб канфіскацыі 16 паветраных шароў з кантрабанднымі беларускімі цыгарэтамі.
