Скарачэнне выпуску прампрадукцыі па-ранейшаму стрымлівае рост эканомікі Беларусі — ЕАБР
20 кастрычніка, Позірк. Адным з фактараў, што стрымліваюць рост эканомікі Беларусі, па-ранейшаму застаецца “скарачэнне выпуску прамысловай прадукцыі ва ўмовах ахаладжэння знешняга попыту”, канстатавалі эксперты Еўразійскага банка развіцця ў штотыднёвым макрааглядзе.
Аналітыкі звярнулі ўвагу на тое, што выпуск прампрадукцыі ў студзені — верасні ў гадавым вымярэнні знізіўся на 1%. Валавы ўнутраны прадукт за гэты перыяд вырас на 1,6% ў параўнанні з аналагічным адрэзкам часу 2024 года.
На думку экспертаў, “спажывецкая і інвестыцыйная актыўнасць працягваюць падтрымліваць пашырэнне эканомікі”. ЕАБР зрабіў такую выснову на аснове даных пра тое, што рознічны тавараабарот у Беларусі ў студзені — верасні павялічыўся ў параўнанні з тым жа леташнім перыядам на 8,2% (пасля 8,5% у студзені—жніўні), а прырост інвестыцый у асноўны капітал паскорыўся да 15,3% (14,5%).
Па выніках 2024 года рост эканомікі склаўся на ўзроўні 4%, 2023-га — 3,9%, у 2022-м ВУП знізіўся на 4,7%, у 2021-м — вырас на 2,3%, у 2020-м — скараціўся на 0,9%.
Міжнародны валютны фонд (МВФ) у кастрычніцкім аглядзе пагоршыў прагноз па росце беларускай эканомікі ў 2025 годзе. На думку аналітыкаў, валавы ўнутраны прадукт Беларусі па выніках 2025 года вырасце на 2,1%, 2026-га — на 1,4%.
Раней Сусветны банк панізіў на 0,3% свой прагноз па росце эканомікі Беларусі ў 2025 годзе — да 1,9% (у чэрвеньскім аглядзе прагноз быў вышэйшы — +2,2%).
Еўрапейскі банк рэканструкцыі і развіцця ў верасні таксама пагоршыў свой папярэдні (травеньскі) прагноз — да 1,7% на 2025 год і да 2,3% на 2026 год.
Зніжэнне тэмпаў росту ВУП Беларусі да 1,6% прагназаваў Еўразійскі фонд стабілізацыі і развіцця ў сваім рэгіянальным эканамічным аглядзе, апублікаваным у красавіку.
Праведзены раней “Позіркам” аналіз даных Белстата паказаў, што ўнёсак машынабудаўнічай галіны ў агульны аб’ём валавога ўнутранага прадукту Беларусі ў першай палове 2025 года склаў 5,1% — на 0,3 працэнтнага пункта менш, чым за першае паўгоддзе 2024 года (5,4%).
Буйныя прамысловыя прадпрыемствы — БелАЗ, БМЗ, МТЗ, МАЗ, а таксама канцэрны “Белнафтахім” і “Беллеспаперапрам” — не выканалі заданні па пастаўках прадукцыі ў Расію. Пра гэта, як паведамляла беларуская амбасада ў Маскве, ішла размова 10 верасня на пасяджэнні міжведамаснай рабочай групы па ажыццяўленні маніторынгу сітуацыі з пастаўкамі ў РФ.
“Нягледзячы на дадатную дынаміку тэмпаў росту экспарту, адзначаныя негатыўныя тэндэнцыі па асобных таварных групах, невыкананне экспартных заданняў асобнымі дзяржаўнымі органамі і прадпрыемствамі”, — гаварылася ў паведамленні.
У жніўні 2025 года беларускі амбасадар у Маскве Аляксандр Рагожнік заявіў у інтэрв’ю дзяржвыданню “СБ. Беларусь сёння”, што па выніках першага паўгоддзя Расія ў структуры беларускага экспарту займала 67%.
