На інжынера сельгаспрадпрыемства ў Мінскай вобласці заведзеная крымінальная справа за хабары, атрыманыя ад замежніка

19 кастрычніка, Позірк. Супрацоўнікі Міністэрства ўнутраных спраў выявілі ў Мінскай вобласці “факты хабарніцтва службовай асобай сельгаспрадпрыемства”, паведаміла прэс-служба ведамства.

Паводле звестак МУС, 30-гадовы галоўны інжынер арганізацыі “сістэматычна атрымліваў незаконныя “падзякі”. “Гатоўку перадаваў замежны грамадзянін за спрыяльнае вырашэнне пытанняў аб выбары яго арганізацыі падрадчыкам рамонту спецыяльнай тэхнікі, а таксама бесперашкоднае прыняцце выкананых работ”, — гаворыцца ў паведамленні.

Узбуджаная крымінальная справа. “Устанаўліваюцца іншыя факты супрацьпраўнай дзейнасці фігуранта і агульная сума хабараў”, — адзначылі ў міністэрстве.

5 кастрычніка МУС паведаміла аб узбуджэнні крымінальнай справы ў дачыненні да галоўнага інжынера сельгасарганізацыі ў Мінскай вобласці, які атрымаў хабар за “спрыяльнае вырашэнне пытання па ацэнцы і спісанню пагрузчыка, які знаходзіцца на балансе прадпрыемства, і наступнай яго рэалізацыі хабарадавальніку”.

“Асобныя станоўчыя тэндэнцыі” ў дынаміцы выяўлення карупцыйных злачынстваў у гэтым годзе “аб’ектыўна страчаны”, заявіў 26 верасня кіраўнік Міністэрства ўнутраных спраў Іван Кубракоў на пасяджэнні калегіі МУС.

Паводле паведамлення прэс-службы ведамства, ён раскрытыкаваў шэраг тэрытарыяльных падраздзяленняў па барацьбе з эканамічнай злачыннасцю (БЭЗ).

Кубракоў таксама адзначыў, што МУС перайшло ад “бытавых” хабараў да выяўлення і спынення схем сістэмнай “дзелавой” карупцыі. Актыўней выкарыстоўваецца інструментарый аператыўна-вышуковай прафілактыкі, сказаў ён.

Намеснік міністра ўнутраных спраў — начальнік крымінальнай міліцыі Генадзь Казакевіч паведаміў, што з пачатку 2025 года спынена 22 схемы, звязаныя з сістэмнай “дзелавой” карупцыяй, у якіх удзельнічалі 114 фігурантаў, з іх 92 — хабарнікі. У сем такіх схем былі ўцягнутыя службовыя асобы сельгаспрадпрыемстваў.

“Акцэнт у працы ОУС ссунуты на выяўленне буйных хабараў. Калі ў 2022 годзе іх агульная сума складала крыху больш за два мільёны рублёў, то ў мінулым — каля шасці. За восем месяцаў бягучага года ўжо каля пяці мільёнаў рублёў”, — сказаў Казакевіч.

Згодна з данымі Вярхоўнага суда, якія раней прыводзіў “Позірк”, у студзені — чэрвені 2025 года за здзяйсненне карупцыйных злачынстваў асуджана 304 чалавекі — на 7,3% менш, чым за той жа перыяд 2024-га (328). З іх 84 прыгавораныя да пазбаўлення волі.