Двух братоў — грамадзян Беларусі дэпартуюць з Украіны за пражыванне без легалізацыі
18 кастрычніка, Позірк. Дваіх грамадзян Беларусі дэпартуюць з Украіны за пражыванне без легалізацыі, вынікае з паведамлення Галоўнага ўпраўлення Дзяржаўнай міграцыйнай службы (ДМС) па Днепрапятроўскай вобласці.
Паводле інфармацыі ведамства, супрацоўнікі ГМС выявілі братоў-блізнюкоў, якія “ўжо працяглы час пражываюць на тэрыторыі Украіны без законных падстаў”, у Крывым Рогу.
“У адпаведнасці з дзейным заканадаўствам за парушэнне правілаў знаходжання ва Украіне названыя асобы прыцягнутыя да адміністрацыйнай адказнасці, а таксама прынятае рашэнне аб іх прымусовым вяртанні ў краіну паходжання або ў трэцюю краіну”, — гаворыцца ў паведамленні.
ДМС заявіла, што знаходжанне замежных грамадзян у Украіне без законных падстаў з’яўляецца парушэннем заканадаўства і “можа прадстаўляць патэнцыйную пагрозу нацыянальнай бяспецы і грамадскаму парадку”.
У жніўні 2022 года беларускія і ўкраінскія праваабарончыя і грамадскія арганізацыі звярнуліся да дзяржорганаў Украіны наконт дыскрымінацыі грамадзян Беларусі ў краіне пасля пачатку вайны.
Нагодай для звароту стала тое, што міграцыйная служба стала масава адмаўляць у легалізацыі беларускім грамадзянам. У прыватнасці, зафіксаваны факты, калі ў іх не прымалі дакументы на падаўжэнне або атрыманне дазволу на жыхарства, загадвалі ім пакінуць Украіну ў найкарацейшыя тэрміны пад пагрозай пакарання, забаранялі наведваць краіну ў будучыні, выстаўлялі невыканальныя патрабаванні аб апастыляванні дакументаў, выдадзеных у Беларусі.
З легалізацыйнымі праблемамі сярод іншых сутыкаліся беларускія валанцёры, а таксама добраахвотнікі, якія ваююць на баку Украіны.
15 ліпеня 2025 года прэзідэнт Украіны Уладзімір Зяленскі зацвердзіў абноўлены закон “Аб грамадзянстве Украіны”. З дакумента вынікае, што Украіна можа надаваць грамадзянства замежнікам і асобам без грамадзянства, якія “ў вызначаным заканадаўствам <…> парадку” праходзяць вайсковую службу на падставе кантракта ў шэрагу ўкраінскіх сілавых структур — Узброеных сілах, Дзяржаўнай спецыяльнай службе транспарту, Нацыянальнай гвардыі.
Згодна з арт. 9, на момант падачы заявы аб прыняцці ў грамадзянства прэтэндэнты маюць альбо бесперапынна пражываць на тэрыторыі краіны на працягу трох гадоў з дня, калі кантракт аб вайсковай службе ў згаданых структурах набыў моц, альбо сама меней адзін год праходзіць службу на падставе кантракта “у перыяд дзеяння ваеннага становішча”.
Такім чынам, з улікам дзейнага ваеннага становішча, беларускія добраахвотнікі, якія падпісалі кантракт з УСУ, маюць права прэтэндаваць на атрыманне ўкраінскага грамадзянства пасля года службы.
