Расельгаснагляд прадухіліў незаконны ўвоз з Беларусі буйных партый рыбы і мяса

17 кастрычніка, Позірк. У Смаленскай вобласці на гэтым тыдні была спыненая спроба незаконнага ўвозу з Беларусі 20 тон рыбнай прадукцыі, а ў Бранскай — больш за 2 тоны мяса невядомага паходжання, паведаміла Федэральная служба па ветэрынарным і фітасанітарным наглядзе (Расельгаснагляд).

У абодвух выпадках гаворка ідзе пра аўтамабілі з беларускімі нумарамі пад кіраваннем грамадзян Беларусі.

У першым выпадку спецыялісты Расельгаснагляду ўстанавілі, што на груз адсутнічаюць ветэрынарныя суправаджальныя дакументы, якія пацвярджаюць яго паходжанне, якасць і бяспеку, а прадстаўленая транспартная накладная ўказвала, што перавозка рыбнай прадукцыі ажыццяўлялася паміж прадпрыемствамі Смаленскай вобласці.

У другім выпадку выяўлена перавозка “мяса ў чвэрцях (верагодна ялавічына) у аб’езд афіцыйных ветэрынарных кантрольных пастоў”. У перавозчыка адсутнічалі ветэрынарныя суправаджальныя дакументы, якія пацвярджаюць паходжанне, якасць і бяспеку грузу.

Вядуцца адміністрацыйныя разбіральніцтвы, вінаватыя будуць прыцягнутыя да адказнасці, паведамілі ў ведамстве.