Літва прыпыняе прыём заяў на працаўладкаванне замежнікаў
15 кастрычніка, Позірк. Прыём новых заяў на працаўладкаванне замежнікаў у Літве прыпыняецца з 15 кастрычніка ў сувязі з “набліжэннем да вычарпання” адпаведнай квоты, устаноўленай на 2025 год, паведаміў Дэпартамент міграцыі пры Міністэрстве ўнутраных спраў краіны.
Дэпартамент, як адзначаецца, разглядае цяпер амаль 5 тыс. заявак на працаўладкаванне замежных грамадзян. Пры гэтым гадавая квота складае 24.830, і з 1 студзеня яна распаўсюджваецца на ўсе прафесіі і віды працоўнай дзейнасці ва ўсіх сектарах эканомікі.
Паводле звестак міграцыйнай службы, на раніцу 15 кастрычніка былі задаволеныя 20.502 заяўкі, яшчэ 4.457 заяў на выдачу часовага віду на жыхарства на падставе працы знаходзілася на разглядзе.
Паведамляецца, што пасля вычарпання ўстаноўленай квоты ВНЖ у Літве на падставе працы можа быць выдадзены ў выпадку, калі заработная плата замежніка будзе складаць не менш за 1,2 сярэдняй зарплаты ў краіне за апошні каляндарны год (на сёння гэта 2.667,6 еўра). Таксама дазвол на пражыванне іншаземец атрымае, калі яго прафесія ўключаная ў пералік прафесій з высокім дабаўленым коштам. Такіх спецыялістаў у Літве не хапае, пры гэтым для атрымання ВНЖ зарплата замежніка павінна быць не менш сярэдняй у краіне (цяпер складае 2.223 еўра).
На 1 кастрычніка дзейны дазвол на пражыванне ў Літве мела 51.213 грамадзян Беларусі. На 1 студзеня 2025 года ўладальнікамі тых ці іншых легалізуючых пражыванне ў краіне дакументаў было 57.511 беларускіх грамадзян (на 1 верасня — 51.520, на 1 жніўня — 51.962, 1 ліпеня — 52.287, 1 чэрвеня — 52.662 чалавекі). Такім чынам, іх колькасць з пачатку года скарацілася на 10,95%.
Сярод уладальнікаў часовага ВНЖ на падставе працы яго атрымала 36.082 (высокакваліфікаваныя спецыялісты — 3.107); месяцам раней было 36.275 і 3.148 адпаведна.
