ДАІ пракантралюе працу маршрутак

14 кастрычніка, Позірк. Прафілактычныя мерапрыемствы па “павышэнні бяспекі перавозак пасажыраў маршрутнымі мікрааўтобусамі ў рэгулярных міжгародніх і прыгарадных зносінах” правядзе Дзяржаўтаінспекцыя з 14 па 22 кастрычніка, паведаміла прэс-служба Міністэрства ўнутраных спраў.

Мэта мерапрыемстваў — “прафілактыка парушэнняў, якія здзяйсняюцца кіроўцамі такога транспарту і службовымі асобамі перавозчыкаў”.

Адзначаецца, што нарады дарожна-патрульнай службы ДАІ “па ўсёй краіне пракантралююць выкананне правілаў дарожнага руху і перавозкі пасажыраў”.

Будуць спыняцца эксплуатацыя няспраўнага транспарту, перавышэнне хуткасці, парушэнне правілаў манеўравання і абгону, праезду на забараняльны сігнал святлафора і перавозкі пасажыраў, не прышпіленых рамянямі бяспекі.

“У выпадку выяўлення парушэнняў, звязаных з парадкам допуску кіроўцаў і няспраўнага транспарту да перавозкі пасажыраў, да кіраўнікоў суб’ектаў гаспадарання будуць ужытыя меры адміністрацыйнага ўздзеяння”, — заявіў першы намеснік начальніка ДАІ МУС Андрэй Гаркуша.

Увечары 10 кастрычніка ў Светлагорскім раёне (Гомельская вобласць) на 72-м кіламетры дарогі Р-31 (Бабруйск — Мазыр — мяжа Украіны) маршрутнае таксі “Мэрсэдэс” сутыкнулася спачатку з трактарам, а затым з аўтамабілем “Фальксваген”, у выніку чаго пацярпела 19 чалавек, з якіх шэсць загінула, восем было шпіталізавана.

Па факце ДТЗ распачатая крымінальная справа паводле ч. 3 арт. 317 КК (парушэнне правілаў дарожнага руху або эксплуатацыі транспартных сродкаў, што пацягнула па неасцярожнасці смерць двух або больш асоб). Паведамлялася, што ў рамках расследавання крымінальнай справы пройдзе праверка транспартнай кампаніі, аўтамабіль якой трапіў у аварыю.

11 кастрычніка стала вядома, што пасля смяротнай аварыі ў Светлагорскім раёне Дзяржаўтаінспекцыя ўзмацняе службу па ўсёй краіне.